Biyl elimizde 2 600 shaqyrym jol kólik qozǵalysy úshin ashyldy. Bul týraly «QazAvtoJol» UK» AQ-nyń basqarma tóraǵasy Ulan Álipov aitty, dep habarlaidy QazAqparat.
«Úkimet aldymyzǵa 2 600 shaqyrym avtomobil jolyn kólik qozǵalysy úshin ashý tapsyrmasyn júktegen bolatyn. Pandemiia áserine qaramastan biz bul kórsetkishti oryndadyq. Bul Táýelsizdik jyldary ishindegi rekord kórsetkish sanalady. Buǵan deiin mundai kólem oryndalǵan emes. Osy ýaqytqa deiin «Batys Eýropa - Batys Qytai» kólik dálizi syndy aýqymdy qurylys júrgizilip, sol kezde ary ketkende 700 shaqyrym jol paidalanýǵa beriletin», - dedi ol búgin elordada BAQ ókilderimen kezdesý barysynda.
Onyń aitýynsha, qurylys maýsymy qyzyp turǵan kezderde jol salý jumysyna 35 myń adam, 15 myń jol-qurylys tehnikasy, 81 asfalt-beton zaýyty jáne 79 tas ýatqysh qurylǵy jumyldyryldy.
«Jyl qorytyndysynda biz 399 shaqyrym joldy paidalanýǵa berip, 2 600 shaqyrym joldy kólik qozǵalysy úshin ashtyq. Sonymen qatar 1 882 shaqyrym jol kúrdeli jáne ortasha jóndeý jumystarymen qamtyldy. Onyń 1 061 shaqyrymynda josparǵa sáikes jumystardy aiaqtadyq», - dedi Ulan Álipov.
