Turǵyn úi qurylysynda biyldyń birinshi aiynda 801 myń sharshy metr baspana paidalanýǵa berildi. Bul týraly Úkimet otyrysynda qańtar aiyndaǵy eldiń áleýmettik-ekonomikalyq damýy taqyrybyn talqylaý kezinde QR Indýstriia jáne infraqurylymdyq damý ministri Beibit Atamqulov málim etti, dep habarlaidy QazAqparat.
«Qurylys salasynda naqty kólem indeksi 2021 jyldyń qańtar aiynda 107 paiyz boldy. Barlyq óńirde oń dinamika baiqalady. Turǵyn úi qurylysynda biyldyń birinshi aiynda 801 myń sharshy metr baspana paidalanýǵa berildi. Iaǵni, 2020 jyldyń sáikes kezeńimen salystyrǵanda 109,4 paiyz boldy», - dedi ministr.
Onyń aitýynsha, elimiz boiynsha barlyǵy 6 810 baspana paidalanýǵa berildi. Bul kórsetkish 16 óńirde artty.
«Ótken jylmen salystyrǵanda turǵyn úidi paidalanýǵa berý kólemi 16 óńirde artty. Tek Mańǵystaý oblysynda tiisti kórsetkish 67,6 paiyzdy qurady. Jalpy biyl elimizde 17 mln sharshy metr turǵyn úi salynady. Memleket basshysynyń tapsyrmasyna sáikes turǵyn úi qurylysy kezinde jergilikti qamtý úlesin arttyrýǵa tiispiz. Bul biznes úshin qurylys materialdarynyń otandyq naryǵyn damytýǵa qosymsha múmkindik beredi», - dedi B. Atamqulov.
«Saladaǵy qajettilikti aiqyndaý maqsatynda negizgi 24 pozitsiia boiynsha qurylys materialdary naryǵyna taldaý júrgizildi. Búgingi tańda otandyq óndirýshiler 10 taýar pozitsiiasy boiynsha ishki naryqtyń qajettiligin tolyǵymen ótei alady (temir-beton buiymdary, qurǵaq qospa, qabyrǵa bloktary, kirpish jáne t. b.). 11 pozitsiia boiynsha elimizdiń kásiporyndary shamamen 50 paiyzdy qamtamasyz etedi (jylý oqshaýlaý, profil qańyltyr, plastik qubyrlar jáne t. b.). Al linoleým, túsqaǵaz, sanfaians siiaqty 3 pozitsiia boiynsha ishki naryqta ázirge óndiris joq», - dedi vedomstvo basshysy.
