Biyl Qazaqstanda 130 mln aǵash otyrǵyzyldy. Bul týraly QR Ekologiia, geologiia jáne tabiǵi resýrstar vitse-ministri Áliia Shalabekova Ortalyq kommýnikatsiialar qyzmetinde ótken baspasóz máslihatynda málim etti, dep habarlaidy QazAqparat.
«Ótken jyly Memleket basshysy Qazaqstan halqyna Joldaýynda 5 jyldyń ishinde orman qoryn 2 mlrd aǵashqa kóbeitý mindetin tapsyrdy. Osy oraida óńir ákimdikteri aǵash otyrǵyzý, iaǵni ormandy damytýdyń 2021-2025 jyldarǵa arnalǵan keshendi josparyn bekitti. Prezident tapsyrmasyn oryndaý boiynsha 1 mlrd 539 mln aǵashty óńir ákimdikteri, al 251 mln aǵashty ministrlik otyrǵyzady. Ministrlik ol aǵashtardy ulttyq parkter men tabiǵi rezervattardyń aýmaǵynda egedi. Sondai-aq tabiǵat paidalanýshylar men ózge de bastamashyl toptardyń kúshimen 210 mln túp aǵash otyrǵyzý kózdelip otyr», - dedi Áliia Shalabekova.
Vitse-ministrdiń aitýynsha, elimizde aǵash otyrǵyzý boiynsha biylǵy jospar tolyq oryndaldy.
«Biyl elimiz boiynsha 62 myń gektar jerge 130 mln túp aǵash otyrǵyzyldy. Onyń ishinde 59,5 millionnan astam sekseýil (46 %), 45 millionnan astam qaraǵai (35%), 8,7 million shegirshin (7%), 5,5 million qaiyń (4%) jáne 11,3 million túp (8%) basqa da aǵash túri egildi. Biylǵy josparǵa sai atalǵan jumysqa 12 mlrd teńge kóleminde qarjy bólindi. Onyń ishinde respýblikalyq biýdjetten 4,6 mlrd teńge jáne jergilikti biýdjetten 7,4 mlrd teńge», - deidi ol.
Odan bólek, ministr orynbasary 422 birlik tehnika men jabdyqtyń satyp alynǵanyn tilge tiek etti.
