QR Aýyl sharýashylyǵy vitse-ministri Aidarbek Saparov biylǵy kóktemgi egis jumystary qalai júrgizilip jatqany týraly aitty, dep habarlaidy QazAqparat.
«Jalpy 2020 jyly aýyl sharýashylyǵy daqyldarynyń jalpy egistik kólemi 22,5 mln ga quraidy. Dándi jáne dándi-burshaqty daqyldardyń alańy 15,2 mln ga, sonyń ishinde bidaidyń alańy – 11,4 mln ga quraidy» - dedi Aidarbek Saparov OKQ-da ótken baspasóz máslihatynda.
Vitse-ministrdiń aitýynsha Memleket basshysynyń tapsyrmasyn oryndaý maqsatynda egis alqaptaryn ártaraptandyrý jáne joǵary rentabeldi daqyldardy ósirýge kóshý boiynsha jumystar jalǵasyp jatyr. Osylaisha,maily daqyldardyń josparlanǵan alańy 3 mln ga aýmaqty quraidy. Bul aýqym ótken jylmen salystyrǵanda 122 myń ga-ǵa kóp.
«Kókónis-baqsha daqyldary men kartoptyń alańy 19 myń tonna, azyqtyq daqyldaryń alańdary 309 myń ga ósimi qamtamasyz etiledi. Tehnikalyq daqyldardyń (qant qyzylshasy, maqta, temeki) alańy 132 myń ga quraidy (18,6 myń ga kem). Egis alańdarynyń qurylymyn, eń aldymen, oblys ákimdikterine ishki naryqtyń qajettiligine qarai jetkizemiz. Mysaly, qaqaqumyqtyń alańynyń 30 myń ga kóbeiýi josparlanǵan. Bul ózimizdi osy daqylǵa degen qajettilikke tolyǵymen qamtamasyz etýge múmkindik beredi», - deidi ol.
Aidarbek Saparov atap ótkendei tuqym daiyndaý máselesiniń de mańyzy zor. Qazirgi tańda 2,5 mln tonna tuqym quiylǵan. Bul tuqymdyq materialǵa degen tolyq qajettilikti qamtamasyz etedi. Búgingi kúni 1 mln tonna tuqym tekserilip, konditsiiaǵa 95 paiyzǵa sáikes keletini anyqtalǵan.
«Oblystardyń jergilikti biýdjetterinde tuqym sharýashylyǵyn damytýdy sýbsidiialaýǵa 11,3 mlrd teńge qarastyrylǵan. Qosymsha respýblikalyq biýdjet qarajatynan shamamen 29,4 myń tonna tuqym jáne 838,7 myń dana elitalyq kóshet satyp alýǵa 2,5 mlrd teńge bólindi. Sondai-aq, joǵary ónimdi alý úshin tyńaitqyshtardy qoldaný mańyzdy ról atqarady», - deidi vitse-ministr.
