2013 jyldan bastap qazaqstandyq sportshylardyń dopingti paidalanýynyń 307 oqiǵasy anyqtaldy. Bul týraly QR Mádeniet jáne sport ministri Aqtoty Raiymqulova málim etti, dep habarlaidy QazAqparat.
«Qazirgi ýaqytta dopingti qoldaný álemdik sport qozǵalysynda eń ózekti máselelerdiń biri boldy. Dopingten shyǵatyn barlyq qaýiptilik aýqymyn túsine otyryp, ony joiýǵa baǵyttalǵan sharalar keshenin turaqty negizde júrgizý qajet. Jyl saiyn Ulttyq dopingke qarsy ortalyq 3 myń biosynamalardy alý jumystaryn jirgizedi. 2013 jyldan bastap qazaqstandyq sportshylardyń dopingti paidalanýynyń 307 oqiǵasy anyqtaldy. 2019 jyldyń 10 aiynda dopingke qarsy erejeni buzýdyń 37 faktisi belgili boldy», - dedi Aqtoty Raiymqulova Parlament Senatynyń jalpy otyrysynda.
Onyń sózine qaraǵanda, dopingti paidalanýdy joiý jónindegi jaǵdaidy taldai otyryp, álemdik sport arenasynda, onyń ishinde Olimpiada oiyndarynda joǵary sporttyq nátijelerge qol jetkizý maqsatynda zańnamalyq deńgeide dopingke qarsy talaptardy kúsheitý jóninde sharalar qabyldaý qajettigi bar. Atap aitqanda, tyiym salynǵan barlyq preparattar men sýbstantsiialardy qoldaný, taǵaiyndaý jáne taratý úshin jaýapkershilikti arttyrý qajet.
Aita keteiik, búgin Parlamenti Senatynyń jalpy otyrysynda «Qazaqstan Respýblikasynyń keibir zańnamalyq aktilerine dene shynyqtyrý jáne sport máseleleri boiynsha ózgerister men tolyqtyrýlar engizý týraly» zań jobasy qaraldy. Zań jobasy dopingke qarsy erejelerdi buzǵany úshin jaýapkershilikti qatańdatýǵa, Ulttyq dopingke qarsy uiymnyń mártebesin kúsheitýge baǵyttalǵan.
