Respýblikalyq biýdjettiń kirisi 2022 jyly 10,2 trln teńge kóleminde baǵalanady. Bul týraly Májilistiń jalpy otyrysynda respýblikalyq biýdjetti talqylaý kezinde Ulttyq ekonomika ministriniń mindetin atqarýshy Timýr Jaqsylyqov málim etti, dep habarlaidy QazAqparat.
«Túzetilgen makroekonomikalyq boljamnyń negizinde biýdjet kiristeri boiynsha boljam naqtylandy. Respýblikalyq biýdjettiń kirisi 2022 jyly 10,2 trln teńge kóleminde baǵalanady, bul bekitilgen jospardan 955 mlrd teńgege joǵary. Kirister boiynsha negizgi ósim munaiǵa boljamdy baǵanyń ulǵaiýy jáne AQSh dollaryna teńge baǵamynyń ózgerýi aiasynda baj mólsherlemesiniń artýy esebinen munaiǵa eksporttyq kedendik baj turǵysynda, sondai-aq makroekonomikalyq kórsetkishterdiń ósýi esebinen korporativtik tabys salyǵy boiynsha kútilýde», - Jaqsylyqov.
Onyń aitýynsha, Ulttyq qordan kepildendirilgen transferttiń mólsheri 4 trln 030 mlrd teńgege deiin nemese 1 trln 630 mlrd teńgege ulǵaitylady.
«Qarajat Memleket basshysy qoiǵan mindetterdi iske asyrýǵa baǵyttalatyn bolady. 2022 jyly biýdjet tapshylyǵyn 2 trln 978 mlrd teńge nemese jalpy ishki ónimge qatysty 3,3% deńgeiinde aiqyndaý usynylady. 2022 jyly munai emes tapshylyqtyń deńgeii baǵalaý boiynsha jalpy ishki ónimge qatysty 10,2% quraidy. Respýblikalyq biýdjettiń shyǵystaryn túzetilgen kólemge qatysty 2,7 trln teńgege ulǵaita otyryp, 18,8 trln teńge kóleminde aiqyndaý usynylady», - dedi ol.
«Qorytyndylai kele, 2022-2026 jyldarǵa arnalǵan áleýmettik-ekonomikalyq damý boljamy sheńberinde 2022 jylǵa arnalǵan makrokórsetkishter men biýdjettik parametrlerdiń boljamyn naqtylaý, birinshi kezekte Memleket basshysynyń tapsyrmalary men qabyldanyp jatqan shuǵyl jáne júielik sipattaǵy qujattardyń negizgi baǵyttaryn iske asyrýǵa baǵyttalǵan», - dedi Timýr Jaqsylyqov.
