Batys Qazaqstan oblysyndaǵy jol-kólik infraqurylymyn damytý máseleleri Úkimettiń turaqty baqylaýynda. Bul jaiynda Senat depýtattarynyń saýalyna QR Premer-Ministri Álihan Smaiylovtyń jaýabynda aitylǵan, dep habarlaidy QazAqparat.
«2022 jylǵa arnalǵan respýblikalyq biýdjette «Kaztalov-Jánibek-RF shekarasy» jáne «Ónege-Bisen-Saiqyn» jol ýchaskelerin kúrdeli jóndeý jobalaryn iske asyrýdy jalǵastyrý úshin 10 mlrd teńge kózdelgen. Respýblikalyq biýdjetti naqtylaý kezinde kórsetilgen maqsattarǵa qosymsha 5 mlrd teńge bólindi. Batys Qazaqstan oblysynyń oblystyq jáne aýdandyq mańyzy bar avtomobil joldaryn rekonstrýktsiialaýǵa biyl respýblikalyq biýdjetten beriletin transfertter aiasynda 3,4 mlrd teńge mólsherinde qarajat bólindi», - dedi Úkimet basshysy jaýabynda.
Sonymen qatar Premer-Ministr2022 jylǵa arnalǵan respýblikalyq biýdjetti naqtylaý kezinde qosymsha 4,9 mlrd teńge mólsherinde qarajat kózdelgen atap ótedi.
«Onyń ishinde: «Chapai-Jańaqala-Saiqyn» avtojolyn rekonstrýktsiialaýǵa, 130-191 shaqyrym – 1,5 mlrd teńge; «Bórli-Aqsai-Jympity» avtojolyn rekonstrýktsiialaýǵa, 68-139 shaqyrym – 1,5 mlrd teńge; «Barbastaý-Aqjaiyq-Inder» avtojolyn rekonstrýktsiialaýǵa, 43-93 shaqyrym – 1,9 mlrd teńge. Batys Qazaqstan oblysyndaǵy jol-kólik infraqurylymyn damytý máseleleri Úkimettiń turaqty baqylaýynda», - dedi Álihan Smaiylov.
Buǵan deiin Prezident uzaq jyldar boiy sheshilmei kele jatqan Batys Qazaqstan oblysyndaǵy kúre joldar problemasy boiynsha Úkimetke jáne aimaq basshysyna tapsyrmalar júktegen edi.
Atalǵan sebepterge bailanysty Indýstriia jáne infraqurylymdyq damý vitse-ministri Berik Kamaliev qyzmetinen bosatylǵan bolatyn. Sondai-aq Batys Qazaqstan oblysynda jol jóndeý jumystarynyń keshigýine bailanysty «QAZAVTOJOL «UK» AQ jáne QR IIDM Avtomobil joldary komitetiniń birqatar qyzmetkeri jaýapqa tartylǵan edi.
