Búgin QR Premer-Ministri Asqar Maminniń tóraǵalyǵymen ótken Úkimet otyrysynda «Nurly jer» turǵyn úi qurylysy memlekettik baǵdarlamasyn jáne «7–20–25» baǵdarlamasyn iske asyrý barysy qaraldy, dep habarlaidy "Ult aqparat" primeminister.kz portalyna silteme jasap.
QR IIDM derekteri boiynsha, 2018 jyly turǵyn úi qurylysyna barlyq qarjy kózderinen 1,2 trln teńge investitsiia salyndy. Bul 2017 jyldyń deńgeiinen 8,1%-ǵa joǵary. Memlekettiń 1 teńgesine jeke investitsiianyń 6 teńgesi tartyldy.
Memleket basshysynyń «Nur Otan» partiiasynyń XVIII sezinde bergen tapsyrmalaryn iske asyrý aiasynda halyqtyń áleýmettik osal toptaryna arendalyq jáne nesielik turǵyn úi salý qarqyny týraly indýstriia jáne infraqurylymdyq damý ministri R. Skliar baiandady.
«12,5 mln sharshy metr turǵyn úi paidalanýǵa berildi, bul 2017 jyldyń deńgeiinen 12,1%-ǵa joǵary. Barlyǵy 113,7 myń kóp páterli jáne jeke úiler salyndy. Turǵyn úi qurylysyndaǵy qazaqstandyq qamtý úlesi 9%-ǵa artty», — dedi R. Skliar.
Biyl 13,1 mln sharshy metr jańa turǵyn úi nemese 118 myń páter salý josparlanǵan.
Ministrdiń aitýynsha, memlekettik investitsiialar esebinen 1,5 mln sharshy metr turǵyn úi paidalanýǵa beriledi, bul 27 myńnan astam baspanaǵa muqtaj adamdardy qamtamasyz etedi.
2019 jyldyń basynan beri (qańtar–aqpan ailary) barlyq qarjy kózderi esebinen 1,7 mln sharshy metr turǵyn úi nemese 15 myń baspana paidalanýǵa berildi (kommertsiialyq turǵyn úiler men jeke turǵyn úilerdi qosa alǵanda).
Jappai turǵyn úi qurylysy júrip jatqan aýdandarǵa injenerlik jelilerdi salý úshin biyl 81,7 mlrd teńge bólý qarastyrylyp otyr.
Sonymen qatar, ol satyp alý quqyǵynsyz arendalyq turǵyn úi salý týraly aqparat berdi.
«Satyp alý quqyǵynsyz jalǵa beriletin turǵyn úilerdiń qurylysy úshin óńirlerge respýblikalyq biýdjetten 32,8 mlrd teńge qarastyrylǵan. Shamamen 4,5 myń páterdiń qurylysy josparlanýda. Memleket Basshysynyń "Nur Otan" partiiasynyń XVIII sezinde bergen tapsyrmalaryn iske asyrý úshin 2019 jylǵa biýdjetti naqtylaý aiasynda kóp balaly otbasylar úshin jaldamaly turǵyn úidiń qurylysyna jáne satyp alýǵa óńirlerge 50 mlrd teńge bólý qarastyrylǵan. Jalpy atalǵan is-sharaǵa 7 jyl ishinde 350 mlrd teńge qarastyrylǵan. Bul jyl saiyn 6 myń kóp balaly otbasyny pátermen qamtamasyz etýge múmkindik beredi. Iaǵni, 7 jylda 40 myńnan astam páter beriledi», — dedi R. Skliar.
Bul úshin búginde 25 mlrd teńgeniń qurylys jobalar tizimi jasalǵan. Daiyn páterlerdi satyp alý úshin 25 mlrd teńge qarastyrylǵan. Bul kóp balaly otbasylardyń turǵyn úi máselelerin sheshýdi tezdetýge yqpal etedi.
2019 jylǵa Astana, Almaty jáne Shymkent qalalarynda jumys isteitin jastar úshin 1 myń jaldamaly páter qurylysyna 7,2 mlrd. teńge qarastyryldy. 3 jylda 3 myń páterdiń qurylysyna 21,6 mlrd teńge qarastyrylyp otyr.
Kredittik turǵyn úi baǵyty boiynsha biyl ákimdikter 11 719 páterdiń qurylysyna 108,8 mlrd teńge tartýdy josparlap otyr.
Turǵyn úi qurylys jinaq banki arqyly kóp balaly otbasylar, múgedek balalary bar nemese múgedek bala tárbielep otyrǵan otbasylar jáne tolyq emes otbasylarǵa 20 jylǵa deiin alǵashqy jarnasy 10% bolatyn jyldyq stavkasy 2% jeńildetilgen kreditteý júiesin engizý josparlanyp otyr.
Alǵashqy jarnaǵa turǵyn úi sertifikatyn paidalanýǵa múmkindik bar.
Atalǵan mehanizmdi 3 jyl ishinde iske asyrý úshin jyl saiyn 50 mlrd teńgeden 150 mlrd teńge qajet bolady.
«Eger "7-20-25" baǵdarlamasy kóbine tólem qabileti bar halyqty qamtityn bolsa, bul oraida áleýmettik sala men biýdjettik uiym jumysshylary úshin Turǵynúiqurylysjinaq bankiniń ónimi basymdyraq. Salymshylar sany 1,3 millionǵa jetti, jinaq kólemi 624 mlrd teńgeni qurady», — dep túiindedi R. Skliar.
Máseleni qaraý barysynda «Baspana» ipotekalyq uiymy» AQ basqarma tóraǵasy Q. Altynbekov sóz sóiledi, ol «7-20-25» baǵdarlamasy boiynsha 120 mlrd teńge somasyna 10,5 ótinim berilgenin, onyń ishinde bankter 72 mlrd teńge somasyna 6,2 myń ótinimdi maquldaǵanyn aitty. Ol sonymen qatar baǵdarlama sharttarynyń ózgergenin jetkizdi, bul halyqty qamtýdy arttyrýǵa, onyń ishinde tabysy tómen otbasylardy da qamtýǵa múmkindik beredi.
Óńirlerde turǵyn úi qurylysyn damytý týraly Pavlodar oblysynyń ákimi B. Baqaýov jáne Batys Qazaqstan oblysynyń ákimi A. Kólginov baiandady.
Óz kezeginde, Premer-Ministrdiń orynbasary J. Qasymbek baspanaǵa muqtaj jandardy turǵyn úimen qamtamasyz etýge qajetti qarajat biýdjette tolyq qarastyrylǵanyn aitty. Bir ai ishinde alǵashqy páterler berile bastaidy. Osyǵan orai, J. Qasymbek jergilikti atqarýshy organdardy atalǵan máseleni erekshe baqylaýda ustaýdy tapsyrdy.
