Biyl elimizde 3 jastan 6 jasqa deiingi balalardy balabaqshamen 100 paiyz qamtamasyz etý josparlanǵan. Bul jaiynda QR Premer-Ministri Asqar Maminniń Senat depýtattarynyń saýalyna bergen jaýabynda aitylǵan, dep habarlaidy QazAqparat.
«Qazaqstan Respýblikasy Eńbek kodeksiniń 99-baby 1-tarmaǵynyń 3) tarmaqshasyna sáikes bala úsh jasqa tolǵanǵa deiin onyń kútimine aqy tólenbeitin demalys beriledi. Bizdiń negizgi mindetimiz belsendi jumyspen qamtylýyna jáne kásipkerlikpen ainalysýyna múmkindik jasai otyryp, jaǵdaiy tómen jáne kópbalaly otbasylarǵa áleýmettik kómek kórsetý, onyń ishinde olardyń eńbek áleýetin yntalandyrý. 3 jastan 6 jasqa deiingi balalardy balabaqshalarda oryndarmen qamtamasyz etý deńgeii 2019 jyldyń sońynda 98,5 paiyzdy quraǵanyn atap ótken jón. Osy jyly Qazaqstan Respýblikasynda bilim jáne ǵylymdy damytýdyń 2020-2025 jyldarǵa arnalǵan memlekettik baǵdarlamasynyń aiasynda bul kórsetkishti 100 paiyzǵa jetkizý josparlanýda», - dedi Asqar Mamin.
Aita keteiik, Senattyń bir top depýtaty Úkimet basshysyna joldaǵan resmi saýaldarynda halyqpen kezdesýler barysynda kópbalaly otbasylardaǵy balalardy tárbieleýden jumysqa shyǵý múmkindiginiń bolmaýyna jáne kóptegen aýyldyq eldi mekenderde mektepke deiingi bilim berý uiymdarynyń bolmaýy men jetispeýine bailanysty jeti jasqa deiingi balany kútýdi júzege asyratyn tulǵalarǵa shartsyz jáne shartty aqshalai kómek túrinde ataýly áleýmettik kómek kórsetýdiń burynǵy tártibine qaita kelýdi ótinip jatqandyǵyn aitady.
