Jyl basynan beri jastardyń áskeri patriottyq tárbiesi úshin 1785 is-shara ótkizilip, oǵan 200 myńnan astam adam qatysty.
Bul týraly Ortalyq kommýnikatsiialar qyzmetinde ótken Aibyn-VI respýblikalyq áskeri-patriottyq jastar jiyny týraly brifingte aityldy, dep habarlaidy QazAqparat.
«Aibyn» respýblikalyq áskeri-patriottyq jastar jiyny «Jas sarbaz» patriottyq qozǵalysy sheńberinde ótkiziledi. Ol Elbasy - QR Tuńǵysh Prezidenti Nursultan Nazarbaevtyń bastamasymen quryldy. Jiynnyń maqsaty - Qazaqstan Respýblikasynda áskeri patriottyq tárbie jumystaryn jetildirý. Qazirgi ýaqytta «Jas sarbaz» qozǵalysynyń filialdary elimizdiń barlyq óńirlerinde bar. Jastarǵa áskeri-patriottyq tárbie berý máseleleri bizdiń qyzmettiń mańyzdy basymdyqtarynyń biri. Áskeri patriottyq klýbtardy, «Jas sarbaz» synyptaryn, «Smart sarbaz» úiirmelerin ashý boiynsha jumystar jalǵasýda. Biyl 25 mamyrdaǵy jaǵdai boiynsha elimizde 5700 áskeri patriottyq uiym bar, onda 200 myń jasóspirim men qyz bala qamtylǵan», - deidi QR Qarýly kúshter bas shtaby Tárbie jáne ideologiialyq jumystar departamenti bastyǵynyń orynbasary Ermiian Biatov.
Onyń aitýynsha, jyl basynan beri jastarǵa áskeri patriottyq tárbie berý boiynsha 1785 is-shara ótkizilip, oǵan 200 myńnan astam adam qatysqan.
«Osy jyly elimizde qalyptasqan epidemiologiialyq jaǵdaiǵa bailanysty jáne qazirgi zamanda elimizdiń jas urpaǵyn áskeri patriottyq tárbieleýde jańa kózqarasty talap etýge bailanysty Qorǵanys ministri, general-leitenant Nurlan Ermekbaevtyń qoldaýymen jiyndy onlain rejimde ótkizý týraly sheshim qabyldandy. Jazǵy demalys kezeńinde biz bul baǵyttaǵy is-sharaǵa balalardyń barynsha kóp qatysqanan qalaimyz. Onlain jiynnyń konkýrstary men jarystary boiynsha erejesi Qorǵanys ministrliginiń saitynda ornalastyrylatyn bolady. Bul balalarǵa «Aibyn» jiynyna sapaly daiyndalýǵa múmkindik beredi», - deidi ol.
