Aýyl sharýashylyǵy vitse-ministri Aidarbek Saparov biyl aýyl sharýashylyǵy ónimin óndirýshilerge dizel otyny naryqtaǵy baǵadan 10 paiyz arzanǵa beriletinin málim etti, dep habarlaidy "Ult aqparat".
«Biyl Energetika ministrligimen kelisim boiynsha egis jumystaryn júrgizýge aqpan-maýsym ailarynda shamamen 387 myń tonna dizel otyny bólindi. Aýa raiynyń kúrdeli jaǵdailaryn eskere otyryp, oblystardyń ótinimi boiynsha qosymsha 10 myń tonna bólinip otyr. Bul barlyq óńirlerdiń dizel otynyna qajettiligin tolyq qanaǵattandyrýǵa múmkindik beredi», - dedi Aidarbek Saparov aýyl sharýashylyǵy ministrliginde ótken alqa májilisinde.
Vitse-ministr bul rette respýblika agrarshylaryna energetika ministrligi qoldaý kórsetip otyrǵanyn jetkizdi.
«Qazir keste Aýyl sharýashylyǵy ministrligi jáne Energetika ministrligimen kelisilip, jumys isteý úshin óńirlerge jiberildi. Biyl aýyl sharýashylyǵy ónimin óndirýshiler úshin dizel otynynyń baǵasy litrine - 177 teńge (JQS-da litri - 195 teńge) bolady. Bul naryqtaǵy baǵadan 10 paiyz arzan», - dedi ol.
