2021 jyly Aral teńiziniń qurǵaǵan tabanyna – shamamen 100 myń gektar jerge sekseýil egildi. Bul týraly QR EGTRM Orman sharýashylyǵy jáne janýarlar dúniesi komiteti tóraǵasynyń mindetin atqarýshy Erlan Qutpanbaev aityp berdi, dep habarlaidy QazAqparat.
«Ǵalymdardyń zertteýleri boiynsha, Aral teńiziniń qurǵaǵan tabanynyń aýdany 4,5 mln gektardy quraidy, onyń 2,2 mln gektary Qazaqstan aýmaǵynda ornalasqan. Aral teńiziniń joǵalýy – Qazaqstannyń ǵana emes, búkil álemniń problemasy. Teńizdiń qurǵaýyna bailanysty jyl saiyn 100 million tonnaǵa deiin tuz, shań jáne qum paida bolady, olar qumdy jáne tuzdy daýyldarmen Eýropa men Antarktikaǵa da jetýi múmkin. Topyraqtyń sortańdanýy men tozýy, shóldiń ulǵaiýy ósimdikter men janýarlar áleminiń damýyna jáne osy aimaqtaǵy jergilikti halyqtyń densaýlyǵyna keri áserin tigizedi. Memleket basshysynyń Aral teńiziniń qurǵaǵan tabanyna sekseýil kóshetterin otyrǵyzý tapsyrmasyn oryndaý sheńberinde 2025 jylǵa deiin teńiz tabanyndaǵy 1,1 mln gektar alqapqa sekseýil otyrǵyzýdyń qadamdyq kestesi ázirlenip, bekitildi. Biyl sekseýil kóshetteri 100 myń ga alqapta júrgizildi, 2022-2025 jyldary jyl saiyn 250 myń gektarǵa egizip otyrady», – dedi Erlan Qutpanbaev.
Memleket basshysynyń tapsyrmasyn júzege asyrý úshin ministrlik orman ósirý jumystaryn úilestirý shtabyn jáne respýblikalyq komissiiany qurǵan. Qazirgi ýaqytta 100 myń gektar alqapqa sekseýil otyrǵyzý boiynsha 2021 jylǵy jospar tolyq oryndaldy, onyń ishinde 64 myń gektar alqap kóshetteri ministrlik kúshimen, 36 myń gektar alqap – Qyzylorda oblysy ákimdiginiń kúshimen júrgizilgen.
Jalpy fitoormanmelioratsiialyq jumystardy júrgizý kezinde Orman sharýashylyǵy jáne janýarlar dúniesi komitetiniń «Respýblikalyq orman selektsiialyq-tuqym ósirý ortalyǵy» RMQK qyzmetkerleri jáne oblys ákimdiginiń orman sharýashylyǵy mekemeleri daiyndaǵan 230 tonna sekseýil tuqymy jumsaldy. Sondai-aq, tuqym daiyndaý úshin maýsymdyq jumysqa 718 adam qabyldandy, mehanikalandyrylǵan egistikti júrgizý úshin 51 adam jumyldyrylǵan.
«Aeroegý boiynsha biylǵy jospardy ýaqytyly oryndaý úshin qyrkúiekten jeltoqsan aiyna deiin Araldyń qurǵaǵan tabanyna 35 dana tehnika jumyldyryldy. Onyń ishinde: 15 dana T-150 traktory, janar-jaǵarmai men aýyz sýdy tasymaldaýǵa arnalǵan 6 júk avtomashinasy, jumysshylardy tasymaldaýǵa arnalǵan 4 joǵary ótimdi avtomashina, 6 vagon jáne 4 mototsikl bar. Sondai-aq, 2022 jyly aeroegý ótkizý úshin jalpy aýdany 64 myń gektar topyraq daiyndaldy», - deidi Erlan Qutpanbaev.
Qazirgi ýaqytta ministrlik halyqaralyq donorlardy, onyń ishinde Dúniejúzilik bankti, Halyqaralyq yntymaqtastyq jónindegi Germaniia qoǵamyn (GIZ), AQSh Halyqaralyq damý jónindegi agenttigin (USAID) jáne basqa da halyqaralyq uiymdardy Araldyń qurǵaǵan tabanyna topyraq-izdestirý jáne konsýltatsiialyq jumystar júrgizý, Qyzylorda oblysynyń orman mekemeleriniń materialdyq-tehnikalyq bazasyn nyǵaitý bóligine tartý jumystaryn júrgizip jatyr.
