2021 jyldan bastap alǵash ret memlekettik sport tapsyrysy engiziledi. Bul týraly Úkimet otyrysynda QR Mádeniet jáne sport ministri Aqtoty Raiymqulova aitty, dep habarlaidy QazAqparat.
«Búgingi kúni aýyldyq eldi mekenderde 24 myńǵa jýyq sport ǵimaraty jumys isteidi. Sportpen shuǵyldanǵysy keletin azamattardyń ósip kele jatqan qajettiligi óńirlerdiń, aýyldy jerdi sport nysandarymen qamtamasyz etý problemasyn aiqyndap otyr. Bul máseleni sheshý úshin elimizdegi aýyldyq eldi mekenderdegi 170 sport nysanyna, onyń ishinde Elbasynyń tapsyrmasy boiynsha salynyp jatqan 55 dene shynyqtyrý-saýyqtyrý keshenine qurylys jumysy, 154 sport nysanyna jóndeý jumysy júrgiziledi», - dedi ministr.
Onyń dereginshe, 2025 jylǵa deiin 1 719 infraqurylymdyq jobany iske asyrý josparlanǵan. Sonymen qatar aýyldarda 881 sport nysanyn salý jáne 838 sport nysanyna jóndeý júrgiziledi.
Memleket basshysynyń buqaralyq sportty damytý týraly tapsyrmasyn iske asyrý aiasynda dene shynyqtyrý men buqaralyq sportty damytýdyń 2020-2025 jyldarǵa arnalǵan keshendi jospary bekitildi. Qujattyń negizgi mindeti – dene shynyqtyrý jáne sportpen shuǵyldanatyn halyqtyń sanyn arttyrý. Bul maqsatta 2021 jyldan bastap alǵash ret memlekettik sport tapsyrysy engiziletin bolady. Nátijesinde 2025 jyly balalar men jasóspirimder sport sektsiialarynyń sany aýyldyq jerlerde 66,5 myń deiin jetkiziledi», - dedi Aqtoty Raiymqulova.
