Ádilet ministri Marat Beketaev saiasi partiialardy qurýǵa ótinim bergenderge qatysty túsinik berdi, dep habarlaidy "Ult aqparat".
Búgin Ortalyq kommýnikatsiialar qyzmetindegi baspasóz máslihatynda saiasi partiialardy qurýǵa ótinim bergenderdi tirkeýge qatysty suraq qoiyldy.
Sońǵy ailarda birneshe ótinim kelip túskenine toqtalǵan ministr, «Halyq derbestigi» boiynsha ótinim qabyldandy, keiinnen bastamashy top sezd ótkizbek boldy. Degenmen olar qujattardy keibir kemshiliktermen, iaǵni zańnamaǵa sáikes kelmeitin tártipte engizdi. Al qalǵan bastamashy toptar bastapqy ótinimdi quqyqtyq kemshiliktermen engizdi. Sondyqtan olar tirkelmedi», - dedi.
Keiinnen Ádilet ministrliginiń baspasóz qyzmeti 2021 jyldyń basynan birlestikterden tek eki ótinim kelip túskenin naqtylady.
Beketaev saiasi partiialardy qurý týraly ótinimge vedomstvo jaýap bergen kezde bastamashy toptardyń naqty qatelikteri kórsetiletinin aitty.
«Kóbine tizimde Qazaqstan azamaty emes adamdardyń jeke málimetteri ótkizilip jatady. Sonymen qatar, zańnama boiynsha saiasi partiia qurýǵa bastamashylyq jasai almaityn azamattar anyqtalyp jatady nemese qaitys bolǵan adamdardyń málimetteri kezdesedi. Iaǵni bul jii kezdesetin jaǵdailar», - dedi ministr.
