Senator Lázzát Súleimen aýyl ákimderin sailaýǵa qatysty túsinik berdi, dep habarlaidy QazAqparat.
Sailaý týraly zań jobasy aiasynda 4 Zańǵa túzetýler engizý kózdelip otyr. Olar «Qazaqstan Respýblikasyndaǵy jergilikti memlekettik basqarý jáne ózin-ózi basqarý týraly», «Saiasi partiialar týraly», «Áskeri qyzmet jáne áskeri qyzmetshilerdiń mártebesi týraly» «Qazaqstan Respýblikasynyń memlekettik qyzmeti týraly» zańdary.
«Zań jobasynyń negizi ózgeristerine toqtalatyn bolsam, aýdandyq mańyzy bar qalalardyń, aýyldardyń, kentterdiń, aýyldyq okrýgterdiń ákimderin sailanbalylyǵyn engizý. Ekinshiden, saiasi partiialardyń Májilis pen máslihattar sailaýy kezinde depýtattyq mandatqa ie bolýy úshin alýy tiis sailaýshylardyń 7 paiyz daýsyn 5 paiyzǵa deiin tómendetý eskerilgen. Úshinshiden, sailaý biýlletenderine «Bárine qarsymyn» degen baǵandy engizý qamtylǵan. Usynylyp otyrǵan kontseptýaldy ózgerister sarapshylar, saiasattanýshylar, sailaýshylar, halyqaralyq uiymdardyń biraz ýaqyttan bergi turaqty pikiri. Bul túzetýler elimizde jergilikti ózin-ózi basqarý institýtyn nyǵaitýdyń kelesi kezeńin qamtamasyz etý úshin jasalyp otyrǵan naqty qadam», - dedi Lázzát Súleimen Senattyń jalpy otyrysynda.
Osy oraida ol Orta Aziia memleketteri arasynda elimiz birinshi bolyp jergilikti ákimder sailanbalylyǵyn engizip otyrǵanyn atap ótti.
«Naqty aitsaq, 2 myń 345 ákimshilik-aýmaqtyq birlik ákiminiń sailanbalylyǵy engizilýde. Bul laýazymdarǵa 2021-2025 jyldar aralyǵynda is basyndaǵy aýyl ákimderiniń ókilettik merzimderiniń aiaqtalýyna orai, kezeń-kezeńmen ótkiziledi. Biyldyń ekinshi jartyjyldyǵynda 836 aýyl ákimi úshin halyq tikelei daýys beretin bolady», - dedi depýtat.
Aýyl ákimdigine úmitkerdi:
– saiasi partiialar ár okrýgte 1 úmitkerden;
– azamattar ózin-ózi usynady (ózin-ózi usynǵan úmitker okrýgtegi sailaýshylardyń keminde 1%–qoldaryn jinaýy tiis);
«Úmitkerdi usyna alatyn úshinshi sýbekt - ol aýdan ákimi.
Eger usyný merziminiń sońyna deiin bir ǵana kandidat qalsa (bizde balamasyz sailaý ótkizilmeidi), aýdan ákimi kandidattar usyna alady. Bul kandidattardy ákim jergilikti qaýymdastyqpen kelisýi kerek. Qazirgi tájiribede keibir aýdan ákimderi jergilikti qoǵamdastyq dep az ǵana azamattarmen kezdesedi degen pikir bar. Tikelei sailaýda buǵan jol berilmeý kerek dep esepteimin. Jergilikti qoǵamdastyq ókilderimen tolyqqandy kelisim bolýy kerek. Sailaýdyń barlyq kezeńderi ashyq, jariialy ótýi, baiqaýshylardyń qatysýy da zańǵa engizilip otyr. Sailaý júiesi – majoritarlyq. Iaǵni, daýys berýge qatysqan sailaýshylar daýsynyń basqa kandidattarǵa qaraǵanda kópshilik daýys alǵan azamat aýyl ákim bolyp sailanady jáne aýmaqtyq sailaý komissiiasy ony tirkegennen keiin birden qyzmetine kirisedi», - dep túsindirdi senator.
