Jumyspen qamtýdyń jol kartasy aiasynda jyl aiaǵyna deiin 75,4 mlrd teńgeniń shaǵyn nesiesin berý kózdelgen. Bul iske óńirdegi ákimdikter men «Atameken» ulttyq kásipkerler palatasy atsalysady, dep habarlaidy QazAqparat.
Eńbek jáne halyqty áleýmettik qorǵaý ministri Serik Shápkenov Úkimet otyrysynda osyndai málimet berdi.
«Biyl jumyspen qamtýdyń jol kartasyn iske asyrýǵa 300 mlrd teńge kózdelgen. Onyń ishinde Memleket basshysynyń tapsyrmasy boiynsha Ulttyq Banktiń obligatsiialyq qaryzy esebinen 200 mlrd. teńge qarastyrylǵan. Biyl jol kartasy halyqtyń ómir súrý sapasyn arttyrý, shaǵyn jáne orta biznesti damytý, agroónerkásiptik keshendi damytý, óńirlerde biznesti damytý siiaqty tórt baǵyt boiynsha iske asyrylady», - dedi ministr.
Vedomstvo basshysy bólingen qarajattyń teń jartysyna jýyǵy halyqtyń turmysyn jaqsartýǵa baǵyttalyp jatqanyn atady.
«Qarjylandyrý limitteri jumys kúshiniń úlesine sáikes aiqyndalyp, óńirler boiynsha bólindi. Qarajattyń negizgi bóligi 42,5%-y nemese 127,5 mlrd teńge halyqtyń ómir súrý sapasyn arttyrýǵa baǵyttalady. Agroónerkásiptik keshendi damytýǵa – 100 mlrd teńge, (33,3%), óńirlerde biznesti damytýǵa jáne «Atameken» UKP men jergilikti atqarýshy organdardyń qatysýymen mikroqarjy uiymdary arqyly mikrokredit berýge – 72,5 mlrd teńge (24,2%) baǵyttalǵan», – dedi Serik Shápkenov.
