Jazǵy demalysta balalardy saýyqtyrý lagerlerinde 2,3 mln qazaqstandyq oqýshy demalady. Bul byltyrmen salystyrǵanda jarty millionǵa kóp, dep habarlaidy BǴM baspasóz qyzmeti.
Sonymen qatar biyl saýyqtyrý lagerleri men alańdardyń sany aitarlyqtai artty. Jalpy respýblika boiynsha 11 myńnan asa (2021 j. – 9 507) mektep janyndaǵy, qala mańyndaǵy, shatyrly, sporttyq jáne kiiz úi lageri jumys isteidi.
«Birinshi kezekte jazǵy saýyqtyrý demalysymen áleýmettik osal sanattaǵy balalar qamtylady. Bul jetim balalar, az qamtylǵan, kópbalaly otbasy jáne tolyq emes otbasylardan shyqqan balalar, múmkindigi shekteýli balalar jáne t.b. Balalar saýyqtyrý lagerleriniń jelisi sanatoriiler, týristik bazalar, ulttyq parkter, joǵary oqý oryndary janynan lagerler ashý jáne jumys istemeitin lagerlerdi qalpyna keltirý esebinen keńeitildi. Qalalyq lagerler jelisin damytý jumystary júrgizilip jatyr. Biyl Qyzylorda oblysynda 3 jáne Aqmola oblysynda 1 lager paidalanýǵa beriledi. Balalardyń jazǵy demalysy úshin qolaily jáne qaýipsiz jaǵdailardy qamtamasyz etý mańyzdy. Qazir ashylýǵa daiyndalyp jatqan lagerlerde konkýrstyq rásimder júrgizilip, olardyń sanitarlyq normalarǵa sáikestigi tekserilip jatyr», - deidi Balalardyń quqyqtaryn qorǵaý komitetiniń tóraǵasy Esenǵazy Imanǵaliev.
Osy jyly balalar men ata-analardy barynsha aqparattandyrý úshin bala-demalys.kz balalar saýyqtyrý lagerleriniń interaktivti kartasy, sait pen mobildi qosymsha (Android jáne IOS platformalarynda) iske qosyldy. Elektrondy kartanyń kómegimen kez kelgen adam naqty ýaqyt rejiminde qandai da bir lager týraly (baǵdarlamasyn, baǵasyn, ornalasqan jerin) aqparat ala alady.
