Úkimet oralmandardy qabyldaýǵa osynshama óńirlik kvota bóldi. Bul týraly Qazaq radiolarynyń Jańalyqtar qyzmeti habarlady.
Qandastardyń 500-i - Pavlodar oblysyna, 350-i - Qostanai oblysyna, 258-i - Aqmola oblysyna, 150-i - Shyǵys Qazaqstan oblysyna, 120-sy - Soltústik Qazaqstan oblysyna kóship kelmek. Óńirler boiynsha bólingen kvota sany osyndai. Kvota sany ótken jylmen salystyrǵanda azyraq. Máselen, 2019 jyly 2 myń 31 óńirlik kvota bekitilgen.
Azamattardy halyq sany az óńirlerge ornalastyrý maqsatynda Úkimet 2016 jyldyń 18 aqpanynda oralmandar men qonys aýdarýshylardy qonystandyrý úshin óńirlerdi aiqyndaý týraly qaýly qabyldaǵan.
Qandastarymyzǵa atalǵan óńirlerge qonystanýyna bailanysty materialdyq kómek beriledi. Otbasynyń árbir múshesine 35 AEK nemese 92 myń 800 teńge birjolǵy tólem tólenedi. Eńbek jáne halyqty áleýmettik qorǵaý ministrligi Eńbek, áleýmettik qorǵaý jáne kóshi-qon komiteti Kóshi qon qyzmetin monitoringileý basqarmasynyń basshysy Dastan Aitqulovtyń aitýynsha, turǵyn úidi jalǵa alý, sondai-aq, kommýnaldyq qyzmetterdi tóleý boiynsha shyǵystardy jabý úshin 12 ai ishinde otbasyna 15-ten 30 AEK nemese 6 myń 100-den 72 myń 200 teńge kóleminde qarjy tólenedi.
Ulttyq qoǵamdyq senim keńesiniń múshesi, aqyn Aýyt Muqibektiń sózinshe, oralmandarǵa óńirlik kvota bólý - quptarlyq jait, alaida tetikteri áli de jetildirýdi qajet etedi.
Eńbek jáne halyqty áleýmettik qorǵaý ministrliginiń aqparatynsha, byltyr 17 myń 661 azamat tarihi otanyna oralyp, oralman mártebesin alǵan. Jalpy táýelsizdik jyldary elge 1 mln 57 myń 280 etnikalyq qazaq oralǵan.
