Jyl basynan beri 1,2 millionnan astam qazaqstandyq turǵylyqty jeri boiynsha elektrondy úkimet portaly arqyly tirkeýge turdy. Bul rette 699 myń qyzmet alýshy HQO-ǵa baryp tirkelýdi jón kórgen, dep habarlaidy "Ult aqparat".
Osylaisha, 2020 jyly egov.kz portalyndaǵy «Qazaqstan Respýblikasy azamattaryn turǵylyqty jer boiynsha tirkeý» qyzmetine suranys eki esege jýyq óskeni baiqalady.
Ótken jyldyń sáikes merzimi ishinde kórsetkish túbegeili basqa bolǵan. HQO arqyly 2,1 millionnan astam qyzmet alynsa, 726 myń tirkeý elektrondyq úkimet portalynda júzege asqan.
«Azamattarǵa arnalǵan úkimet» memlekettik korporatsiiasynyń basqarma tóraiymy Ásemgúl Baltashevanyń aitýynsha, elektrondy qyzmetterge degen suranystyń kúrt ósýi COVID-19 pandemiiasy men tótenshe jaǵdai kezinde halyqqa qyzmet kórsetý ortalyqtarynyń jabylýyna bailanysty. «Pandemiia elektrondy qyzmetterdiń damýyna úlken serpin berdi. Eger buryn úlkeni de, kishisi de qarapaiym anyqtamalar úshin halyqqa qyzmet kórsetý ortalyǵyna barýdy jón kóretin bolsa, karantin jaǵdaiynda densaýlyqtaryna alańdaǵan azamattar memlekettik qyzmetterdi óz betinshe onlain túrde ala bastady. Kún saiyn myńdaǵan adam qyzmet alýǵa keletin memlekettik qyzmetterdiń biryńǵai provaideri retinde bul bizdi óte qýantyp otyr. Azamattarǵa budan da kúrdeli qyzmetterdi usyný múmkindigi jasalýda», – dedi Baltasheva.
Egov.kz elektrondy úkimet portalynda turǵylyqty jeri boiynsha tirkelý úshin ótinish berýshiniń jáne jyljymaityn múlik iesiniń elektrondyq tsifrlyq qoltańbasy bolýy kerek. Tirkelýshi azamat ótinish jasap, múlik iesi ony rastaýy qajet. Turǵyndardy tirkeý qyzmetin «Azamattyq, migratsiia jáne immigratsiia» – «Halyqty tirkeý jáne tirkeý esebinen shyǵarý» bóliminen tabýǵa bolady.
Eske salaiyq, 2019 jyldyń maýsym aiynan bastap azamattardy turǵylyqty jeri boiynsha tirkeý qyzmetin «Azamattarǵa arnalǵan úkimet» memlekettik korporatsiiasynyń qyzmetkerleri júzege asyra bastady.
Bul halyqqa qyzmet kórsetý ortalyqtarynyń jumys kestesine sáikes tirkeý qyzmetterin usynýǵa múmkindik berdi, iaǵni tańǵy 9.00-den keshki 20.00-ge deiin túski úzilissiz, sondai-aq kóshi-qon politsiiasynyń derekter bazasyna tirkeý múmkindigi bar qyzmetkerlerdiń sanyn kóbeitip, osy qyzmet túrine kezekti azaitty.
