QR aýyl sharýashylyǵy ministri S. Omarov QR Premer-Ministri A. Maminniń tóraǵalyǵymen ótken Úkimet otyrysynda 2019 jylǵy qańtar-qazandaǵy aýyl sharýashylyǵy salasyn damytý týraly baiandady, dep habarlaidy "Ult aqparat"
S. Omarov mal sharýashylyǵynda jalpy ónim shyǵarylymy 3,9%-ǵa artqanyn, onyń ishinde et óndirisi 5,5%-ǵa, sút óndirisi 3,2%-ǵa óskenin atap ótti.
«Mal sharýashylyǵy ónimderi óndirisiniń ósýi mal sharýashylyǵyndaǵy nesielendirý baǵdarlamalarynyń sátti iske asyrylýyna bailanysty boldy», — dep S. Omarov, osy jyldyń 10 aiynda 78,9 myń bas iri qara mal satyp alýǵa 806 sharýashylyqqa nesie berilgenin, ótken jyldyń osyndai kezeńinde 39,1 myń bas satyp alýǵa 412 sharýashylyqqa nesie berilgenin aitty.
954 sharýashylyqqa 337,4 myń bas kóleminde usaq analyq mal basyn satyp alýǵa kredit berildi, bul 2018 jyldyń 10 aiymen salystyrǵanda 223,9 myń basqa jáne 624 sharýashylyqqa kóp.
«Yrys» baǵdarlamasy boiynsha jyl basynan beri jalpy sany 1 600 basqa arnalǵan úsh ónerkásiptik taýarlyq sút kesheni jáne 712 basqa arnalǵan 8 otbasylyq taýarlyq sút fermasy iske qosyldy (2018 jyly – 6 myń basqa arnalǵan 18 otbasylyq, 7 ónerkásiptik taýarlyq sút fermasy).
Biyl 15 myń basqa arnalǵan úsh bordaqylaý alańy paidalanýǵa berildi, eki bordaqylaý alańynda mal orny 35 myń basqa deiin ulǵaityldy.
Osy kezeńde tamaq ónimderin óndirý 2,1%-ǵa, sýsyn óndirý 13,9%-ǵa ósti.
Esepti kezeńde salaǵa 379,4 mlrd teńge investitsiia tartyldy, bul ótken jyldyń osyndai kezeńimen salystyrǵanda 37%-ǵa kóp. Ósim «QazAgro» holdinginiń kredittik ónimderin iske asyrý arqyly qamtamasyz etildi.
Máselen, osy jyldyń 10 aiynda kredit berý kólemi ótken jyldyń osyndai kezeńimen salystyrǵanda 32%-ǵa artyp, 362 mlrd teńgeni qurady.
90 mlrd teńge somasyna 5 531 birlik aýyl sharýashylyǵy tehnikasy men jabdyǵyn lizingke alýǵa sharttar jasaldy, bul ótken jyldyń osyndai kezeńimen salystyrǵanda 57%-ǵa kóp.
Budan ózge, qazirgi ýaqytta sheteldik investorlardyń qatysýymen jalpy somasy $3 mlrd-tan astam qarajatqa barlyǵy 30-ǵa jýyq iri investitsiialyq joba iske asyrylýda. Jobalardy qarjylandyrý investorlardyń óz qarajaty esebinen de, ekinshi deńgeili bankter men «QazAgro» holdinginiń enshiles kompaniialary arqyly da júzege asyrylýda.
«Jańa ótkizý naryqtaryn ashý úshin Aýyl sharýashylyǵy ministrligi importtaýshy elderdiń fitosanitariialyq jáne veterinariialyq talaptaryn kelisý boiynsha josparly jumystar júrgizýde», — dedi ministr S. Omarov.
Búgingi kúni agroónerkásiptik keshen ónimderiniń 19 túrine Qytai naryǵyna shyǵýǵa ruqsat berildi. Bul — siyr eti, qoi eti, tiri jylqy, balyq, bal, bidai, bidai kebegi, soia burshaǵy, jońyshqa, raps kúnjarasy, arpa, júgeri, bidai uny, sút ónimderi, jún shikizaty, zyǵyr tuqymy, shoshqa eti, azyqtyq bidai uny.
Sondai-aq, qoi eti, siyr eti, tiri iri qara mal jáne soiýǵa arnalǵan usaq mal, taǵamdyq jumyrtqa boiynsha Iran men Birikken Arab Ámirlikteri, balyq, maily daqyldar men azyqtar boiynsha Eýropa odaǵy, tiri iri qara mal jáne soiýǵa arnalǵan usaq mal boiynsha Saýd Arabiiasy, siyr jáne qoi eti boiynsha Bahrein sekildi jańa ótkizý naryqtary ashyldy.
Sonyń nátijesinde 2019 jyldyń 8 aiynda agroónerkásiptik keshen ónimi eksportynyń kólemi $2 040,6 mln qurady, bul 2018 jyldyń osyndai kezeńimen salystyrǵanda 9%-ǵa kóp.
