Búgin Bishkekte memlekettik saparmen kelgen Qazaqstan Prezidenti Qasym-Jomart Toqaev pen Qyrǵyzstan Prezidenti Sooronbai Jeenbekovtiń kezdesýi bastaldy, – dep habarlaidy «Ult aqparat».
Aita keterligi, Ala-Archa memlekettik rezidentsiiasyna kelgen Qasym-Jomart Toqaevty Sooronbai Jeenbekov qarsy aldy.
Qazaqstan Prezidentiniń saparyna orai Qurmetti qaraýyl sap túzep, Prezident orkestri eki eldiń memlekettik Ánuranyn oryndady. Qurmetti qaraýyl bastyǵy raport berdi. Memleketter basshylary Qurmetti qaraýyldyń qataryn aralap shyqty. Osydan keiin Prezidentter bir-birine delegatsiia múshelerin tanystyrdy.
Saltanatty shara aiaqtalǵan soń Qasym-Jomart Toqaev pen Sooronbai Jeenbekov kelissóz zalyna ótti.
Dál qazirgi ýaqytta Qazaqstan men Qyrǵyzstan Prezidentteriniń qatysýymen shaǵyn quramdaǵy kelissózder bolyp jatyr. Odan keiin eki el delegatsiialarynyń qatysýymen Qazaqstan Respýblikasy men Qyrǵyz Respýblikasy Joǵary memleketaralyq keńesiniń kezekti besinshi otyrysy ótedi. Atalǵan kelissózder barysynda barlyq salany qamtityn máselelerdiń keń aýqymy jan-jaqty talqyǵa túsedi. Qorytyndysynda Memleket basshylary buqaralyq aqparat quraldaryna birlesken málimdeme jasaidy dep kútilýde.
Aita keteiik, kezdesý nátijesinde birqatar qujattarǵa qol qoiylady dep josparlanýda.
Budan buryn habarlanǵandai, búgin Qasym-Jomart Toqaev memlekettik saparmen Bishkekke keldi.
Sapar aiasynda Qazaqstan Prezidenti men Qyrǵyzstan Prezidenti «Ata-Beiit» ulttyq tarihi-memorialdyq keshenine bardy.
Qazaqstan Qyrǵyzstannyń eń basty saýda-ekonomikalyq jáne investitsiialyq seriktesteriniń biri bolyp sanalady. 2018 jyly ózara saýda kólemi 13,1 paiyzǵa ósip, 865,3 mln dollarǵa jetti. Sonymen qatar, ótken jylmen salystyrǵanda 2019 jylǵy birinshi jartyjyldyqta eki el arasyndaǵy taýar ainalymy 13,2 paiyzǵa tómendep 389,4 mln dollardy qurady. Bul rette Qazaqstannan Qyrǵyzstanǵa eksporty osy kezeńde 269,2 mln AQSh dollar bolǵanyn atap ótken jón.
