Búgin Bishkekte Qazaqstan Premer-Ministri Álihan Smaiylov pen Qyrǵyzstan Ministrler kabinetiniń Tóraǵasy Aqylbek Japarovtyń tóraǵalyǵymen Qazaqstan-Qyrǵyzstan Úkimetaralyq keńesiniń 10-otyrysy ótti.
Qazaqstan Úkimeti resmi saitynyń málimetinshe, shaǵyn jáne keńeitilgen quramdaǵy Úkimetaralyq kelissózderde taraptar saýda-ekonomikalyq, sý-energetikalyq, kólik-logistikalyq, ónerkásiptik jáne investitsiialyq salalardaǵy ekijaqty yntymaqtastyqtyń ózekti máselelerin talqylaǵan.
Qyrǵyz tarapyna jyly shyraimen qabyldaǵany úshin alǵys bildire otyryp, Álihan Smaiylov Qyrǵyzstan Qazaqstannyń negizgi saýda-ekonomikalyq seriktesteriniń biri ǵana emes, sonymen qatar dástúrli dostyq qarym-qatynastar bailanystyratyn baýyrlas memleket ekenin atap ótti.
Qazaqstan Úkimetiniń basshysy eki el arasyndaǵy taýar ainalymyn arttyrý máselesine erekshe toqtaldy, ol qazirdiń ózinde 1 mlrd dollarǵa jetip otyr.
«Álbette, biz munymen shektelip qalmaimyz, eki eldiń áleýeti budan da joǵary dep esepteimin. Bizdiń aldymyzda turǵan endigi mindet – ózara saýda deńgeiin 2 mlrd dollarǵa deiin jetkizý», – dedi Álihan Smaiylov.
QR Premer-Ministriniń oiynsha, qoiylǵan maqsatqa qol jetkizý úshin taýar nomenklatýrasyn keńeitý, indýstriialyq saýda-logistikalyq keshenderdi qurý jónindegi jumysty jandandyrý, sondai-aq kóleńkeli taýar ainalymyna qarsy kúres sharalaryn kúsheitý qajet.
Óz kezeginde Qyrǵyz Ministrler kabinetiniń basshysy Aqylbek Japarov eki halyq arasyndaǵy tarih pen mádeniettiń ortaqtyǵyna, ózara túsinistik pen senimge negizdelgen dostyq jáne baýyrlastyq bailanystar ortaq maqsat – halyqtarymyzdyń gúldenýi men ál-aýqatyn arttyrýǵa kómektesetinine senim bildirdi.
Kezdesý sońynda taraptar kelissózderdiń jemisti bolǵanyn atap ótip, tatý kórshilik jáne strategiialyq seriktestik rýhynda memleketaralyq belsendi is-qimyldy jalǵastyrýǵa daiyn ekenderin bildirdi.
Kelissózder qorytyndysy boiynsha Úkimetaralyq keńestiń 10-otyrysynyń hattamasyna, sondai-aq «GFC Bishkek» JShQ qurý týraly kelisimge qol qoiyldy.
Kelisim AHQO Jasyl qarjy ortalyǵynyń jáne qyrǵyzstandyq seriktester – «Aiyl Bank» AAQ, «Qyrǵyz qor birjasy» JAQ jáne «Qyrǵyzstan bankteriniń odaǵy» ZTB qatysýymen birlesken kompaniia qurýdy kózdeidi.
Birlesken kompaniiany qurý Astana halyqaralyq qarjy ortalyǵyn Qyrǵyzstanda jáne Ortalyq Aziia óńirinde ilgeriletýge baǵyttalǵan.
