Qyrǵyzstannyń astanasynda urlyqqa qatysy bar degen kúdikpen bir top «gastroler-urylar» ustaldy, dep habarlaidy QazAqparattyń menshikti tilshisi Bishkektiń ishki ister bas basqarmasynyń baspasóz qyzmetine silteme jasap.
Bishkektiń Oktiabr aýdanynyń Ishki ister basqarmasyna qalanyń shaǵyn aýdandarynyń birinde turatyn adam habarlasqan. Azamat 2018 jylǵy 3 sáýirde belgisiz adamdar páterine kirip, baǵaly zattaryn urlap áketti dep aryz jazǵan.
Biylǵy jyldyń mamyr aiynda IIB-na Bishkektiń taǵy bir turǵyny shaǵym túsirgen. Onyń aitýynsha, báz bireýler áieldiń úiine kirip, 50 myń som aqshany urlap, alyp ketken.
Atalǵan faktiler boiynsha Qyrǵyz Respýblikasy QK 164-babyna («Urlyq») sáikes qylmystyq is qozǵaldy. Jedel izdestirý sharalary kezinde Qazaqstannyń eki azamaty -1983 jyly týǵan G. V jáne 1979 jylǵy Sh. R. ustaldy. Azamattardyń osyǵan uqsas qylmystarǵa qatystylyǵy tekserilip jatyr. Jedel tergeý sharalary júrgizilýde.
Jaldamaly páterdi tintý kezinde kúdiktilerden 5 uialy telefon, saǵat, elektroshoker, qolǵap, ár túrli kiltter, zergerlik buiymdarǵa arnalǵan ólsheýishter, dollarlar men somdar tárkilengen. Ustalǵan azamattar Bishkek qalasynyń Ishki ister bas basqarmasynyń ýaqytsha tergeý izoliatoryna qamaldy.
Buǵan deiin de páter tonaityn qazaqstandyq «gastroler-urylar» 2018 jyly aqpan aiynda Qyrǵyzstannyń astanasynda ustalǵan bolatyn.
