Foto: © Sputnik / Bolat Shaihinov
Bas prokýrordyń orynbasary Jandos Ómiráliev áielin óltirdi degen kúdikpen qamalǵan eks-ministr Qýandyq Bishimbaevtyń isine qatysty túsinikteme berdi, dep habarlaidy Sputnik Qazaqstan.
Onyń aitýynsha, Bishimbaevqa qatysty "Asa qatigezdikpen jasalǵan adam óltirý" baby boiynsha qylmystyq is qozǵalǵan. Ol qazir ustaldy. Sonymen birge qylmysty jasyrǵany úshin eks-ministrdiń týysqany da qamaldy.
"Ol aǵasy ma, inisi ne, men ony naqty aita almaimyn. Biraq týysqany ekeni naqty. Sol kúni qasynda bolǵan jáne aýyr qylmystyń jasalǵandyǵy týraly politsiia organdaryna habarlamaǵan. Bul - jeke bap. Tipti, bul qylmysty jasyrýǵa tyrysqan", - dedi Ómiráliev Májilis kýlýarynda jýrnalister suraǵyna jaýap berip.
Ol qylmystyq is boiynsha barlyq saraptama jasalatynyn atap ótti.
"Marqumnyń ólimine alyp kelgen, árine, tikelei Bishimbaevtyń zańsyz is-áreketi ekendigi sózsiz. Saraptamalar daiyn bolǵannan keiin qosymsha aqparat beriledi", - dedi Bas prokýrordyń orynbasary.
Eske sala keteiik, 9 qarashada burynǵy ulttyq ekonomika ministri Qýandyq Bishimbaevtyń elordadaǵy meiramhanalardyń birinde áielin uryp óltirgeni týraly habar qoǵamdy dúr silkindirgen edi.
Keibir BAQ betterinde Bishimbaevtyń "mas kúide bolǵany", tipti "esirtkige mas bolǵany" týraly habarlandy. Politsiia marqumnyń jedel járdem kelgenshe qaitys bolǵanyn aitty.
IIM sol kúni meiramhanadaǵy janjaldyń saldarynan alǵan dene jaraqattarynan bir áieldiń qaitys bolǵanyn rastaǵan edi. Alaida oqiǵaǵa qatysty qandai da bir aqparat bergen joq: zardap shegýshiniń atyn ataǵan joq.
Keiinnen Ishki ister ministrligi Astana meiramhanasyndaǵy kisi ólimi boiynsha Qýandyq Bishimbaevtyń ustalǵanyn rastady.
Qýandyq Bishimbaevtyń áieliniń ólimin tergeý barysynda oqiǵa bolǵan "Bau" meiramhanasy ornalasqan Gastro ortalyq direktory qylmysty jasyrdy degen kúdikke ilinip, ýaqytsha ustaý izoliatoryna qamaldy.
