Foto ©️ Tengrinews.kz / Týrar Kazangapov
Saltanat Núkenovanyń ólimine qatysty is boiynsha sottalǵan Baqytjan Baijanovtyń raqymshylyq jasaý týraly ótinishi qanaǵattandyryldy, - dep habarlaidy Ult.kz.
Stepnogorsk qalalyq soty "QR Konstitýtsiiasynyń otyz jyldyǵyna bailanysty raqymshylyq jasaý týraly" zańdy qoldanyp, sottalǵan B.-nyń jazasyn óteý merzimin qysqartý týraly QAJ mekemesiniń usynysyn qarady.
"Sot 2024 jylǵy 13 mamyrda B. QR QK 432-baby boiynsha tórt jylǵa sottalǵanyn anyqtady. Sot sottalǵan B.-ǵa qatysty usynysty mynadai negizder boiynsha qanaǵattandyrdy: QR QK 78-babynyń 2-bóligine sáikes aýyr nemese asa aýyr qylmys jasaǵany úshin sottalǵan adamdarǵa jaza merzimi qysqartylýy múmkin. "Qazaqstan Respýblikasy Konstitýtsiiasynyń otyz jyldyǵyna bailanysty raqymshylyq jasaý týraly" zańǵa sáikes negizgi jazanyń ótelmegen bóliginiń merzimi nemese mólsheri zalal ótelgen jaǵdaida ne olar bolmaǵan kezde aýyr qylmystar boiynsha úshten birine qysqartylady", - dep jazylǵan sot habarlamasynda.
Sot úkimimen B.-dan óndirip alynǵan májbúrli tólem jáne is júrgizý shyǵyndary tolyq kólemde ótelgen.
Sot qaýlysymen B.-nyń jaza merzimin qysqartý týraly usynys qanaǵattandyryldy.
"QR Konstitýtsiiasynyń otyz jyldyǵyna bailanysty raqymshylyq jasaý týraly" zańǵa sáikes jaza merziminiń ótelmegen bóligi qysqartylyp, túpkilikti 1 jyl 4 ai 17 kúnge bas bostandyǵynan aiyrý merzimi belgilendi.
Sot aktisi zańdy kúshine engen joq.
Aita keteiik, Baijanov biyl 9 shildede Stepnogorsk aýdandyq sotyna júgingen bolatyn.
