Milliard teńge jymqyrdy dep aiyptalǵan Qýandyq Bishimbaevtyń advokattary málimdeme jasady, - dep habarlaidy "Ult aqparat" kaz.tengrinews.kz portalyna silteme jasap.
"Qurmetti BAQ ókilderi men jýrnalister. Sońǵy ýaqytta buqaralyq aqparat quraldarynda Bishimbaev Qýandyq Ýálihanulyna qatysty tergeý jaily materialdar belsendi túrde taralyp jatyr. Bul málimdemege jariialanymdardyń aiyptaý sipatynda jazylyp jatqany sebep. BAQ-tar men TV siýjetterinde shyntýaitynda Q.Ý. Bishimbaev qylmys jasaǵan jáne bul bekitilgen derek retinde aitylyp otyr", - delingen málimdemede.
Alaida, advokattardyń aitýynsha, bul qylmystyq is tergeý satysynda jáne sotaldy óndiris júrgizilip jatyr. Sondai-aq, advokattar QR Qylmystyq kodeksine sáikes (19-bap), adam óziniń kinási anyqtalǵan qoǵamǵa qaýipti is-áreketteri (áreketteri nemese áreketsizdigi) úshin ǵana qylmystyq jaýaptylyqqa jatatynyn eske salady. Sondai-aq, Ata zańnyń 77-babyna sáikes, adamnyń kináli ekendigi zańdy kúshine engen sot úkimimen tanylǵansha ol jasalǵan qylmysqa kináli emes dep esepteletini aitylady.
"Eshkim de qandai da bir isi boiynsha sot arqyly dáleldenbeiinshe, aiypty bolyp eseptelmeitinin atap ótemiz", - dei kele advokattar "Joǵaryda atalǵan jáne olarǵa uqsas materialdardy apelliatsiiaǵa jatpaityn jáne aiyptaý sipatyndaǵy materialdar dep bilemiz, onda qorǵaýymyzdaǵy azamattyń kinási dáleldengendei sipat bar, bul qoǵam aldynda qorǵaýymyzdaǵy azamat týraly jaǵymsyz pikir qalyptastyrady. Qýandyq Ýálihanulyna qatysty mundai málimetterdi tergeý aiaqtalmai turyp, sot qaramai jatyp, taratýǵa jol joq ekenin aitqymyz keledi", - dep, eskertý jasady.
"QR "Buqaralyq aqparat quraldary týraly" zańynyń 25-babyn negizge ala otyryp, azamattyń ar-namysy men abyroiyna ziian keltiretin shyndyqqa janaspaityn málimetti taratýǵa zańǵa sáikes jaýaptylyqqa ákep soǵatynyn eskerte otyryp, BAQ-qa aitqymyz keletini, mundai aiyptaý sipatyndaǵy materialdardy jazbaýǵa jáne qorǵaýymyzdaǵy azamatqa qatysty taqyryptarda abai bolýǵa shaqyramyz. Bul jariialanymdar adam taǵdyry jaily ekenin umytpaýdy suraimyz", - deidi advokattar.
Sonymen qatar, olar istiń ádil tergelip, ádil sot ótetinine senim bildirdi.
Eske salaiyq, Bishimbaevtyń ustalǵany jaily 2017 jyldyń 10 qańtarynda belgili bolǵan edi. Qýandyq Bishimbaev Astanadaǵy ýaqytsha ustaý izoliatoryna qamalǵan. Keiin Antikorrýptsiialyq qyzmet Bishimbaevty 1 milliard teńge jymqyrdy dep aiyptady.
