Eks-ministr Qýandyq Bishimbaev jaza merzimin óteý úshin Túrkistan oblysyndaǵy Lenger qalasyndaǵy túrmege jiberýdi ózi suraǵan. Atalǵan túrmede aýyr jáne asa aýyr qylmystar úshin sottalǵandar otyrady, dep habarlaidy QazAqparat tilshisi.
QR IIM Qylmystyq atqarý júiesi komitetiniń baspasóz hatshysy Ǵalymjan Hasenovtyń aitýynsha, eks-ministr ótinish jazyp, Lenger qalasyndaǵy túrmege jiberýdi surady. Atalǵan másele Qylmystyq atqarý kodeksiniń 88-babynda kórsetilgen. Oǵan sáikes, sottalǵan azamat áleýmettik paidaly qarym-qatynasty ustaimyn dep, naqty bir túrmege jiberýdi surai alady. Q.Bishimbaev týra sondai ótinish jazyp, Lenger jaqta týǵan-týystarynyń turatynyn kórsetken.
«Osyǵan bailanysty sottalǵan Bishimbaev 5 shildeden bastap Túrkistan oblysy Lenger qalasyndaǵy ICh 167/9 mekemesinde óz jazasyn ótep júr. Ol - qatań rejimdegi koloniia. Shamamen, 500 adamǵa arnalǵan. Ondai túrmege aýyr jáne asa aýyr qylmystar úshin alǵash ret sottalǵandardy jiberedi», - dedi Ǵ.Hasenov.
Onyń aitýynsha, qazirgi kezde ol koloniiada 400-den astam adam otyr.
«Qýandyq Bishimbaevqa eshqandai jeńildik jasalmaidy. Bir oryndy kamera da bolmaidy. Ol barlyq sottalǵandarmen birge jatady», - dep atap kórsetti komitettiń baspasóz hatshysy.
Aita keteiik, eks-ministr Qýandyq Bishimbaev isi boiynsha sotta 23 adam jaýap berdi. Olar Qyzylorda oblysyndaǵy shyny zaýytynyń qurylysyna arnalǵan 1 mlrd teńgeni qoldy qylǵan. Bishimbaev bir emes, birneshe ret para aldy. Sol úshin 10 jylǵa sottaldy.
