Kollaj: Tengrinews.kz
Tengrinews.kz tilshisi Saltanattyń týysqany Samal Núkenovamen sóilesti. Olardyń ákeleri aǵaiyndy. Samal sińilisiniń denesinen kógergen jerlerin buryn da baiqaǵanyn jáne oǵan burynǵy ulttyq ekonomika ministri Qýandyq Bishimbaevpen qarym-qatynasyn úzýge keńes bergenin aitty.
"Bir nárseni aita alamyn: ol (Bishimbaev – esk.) - qubyjyq, jaýyz. Adamdar bundai qatygez bolady dep tipti oilamappyn. Saltanattyń denesin alǵan kezde ony kórgenderdiń bári shoshyp ketti. Olardyń túrin kórseńizder ǵoi", – deidi Núkenova.
Samaldyń aitýynsha, ol byltyr sińilisiniń uzatýyna qatysqan, jeltoqsanda Astanada toi ótken. Bul rette olardyń qarym-qatynasyn keremet dep ataýǵa bolmaidy, Samaldyń aitýynsha, Qýandyq únemi qol kóterip júrgen.
"Ol birneshe ret qurbylaryna onyń tarapynan uryp-soǵý bolǵanyna shaǵymdanǵan. Biz denesi kógerip júrgenin ózimiz kórdik. Qyrkúiektiń aiaǵynda otbasylyq is-shara ótkizdik. Saltanat kúrteshe kiip keldi, onyń ishinde qysqa jeńdi jeide boldy. Ol kúrteshesin sheshkende, onyń qolynda kógergen jerlerdi kórdik. Ne boldy dep suraǵanymyzda tez kúrteshesin qaita kiip, ol massajdan ekenin aitty... Jalpy, ol (Bishimbaev – esk.) tiran ekenin aityp, birneshe ret odan ketpek boldy. Saltanat kúieýi ony eshqaida jibermeitinin, únemi baqylap júrgenin aitatyn, tipti kofe ishý úshin bizben sebepsiz kezdese almaityn. Biz onyń ketýin qoldaitynbyz, biraq ol qaitarý úshin bárin jasaidy", - dedi marqumnyń týysy.
Samaldyń aitýynsha, Saltanat pen kúieýi qaiǵyly oqiǵa bolǵan meiramhanada birneshe ret bolǵan. Qyz bul mekemeniń kimge tiesili ekenin anyq bilmeitinin, biraq "Bishimbaev onda ózin qojaiyndai sezinetinin" aitady.
"Ol únemi baryp turatyn. Saltanat ekeýi osy meiramhanada birge otyrǵan", - dedi Samal.
Sondai-aq, Núkenovanyń aitýynsha, Bishimbaevtyń týystary jerleý rásimine qatysqan, biraq keshirim suramaǵan. Alaida olardyń otbasy Qýandyqty keshirýge nietti emes.
"Iá, olar jerleýge keldi. Saltanattyń anasymen sóilestim, ol keshirim suraý bolmaǵanyn aitty. Biraq bolǵan kúnniń ózinde biz olardy qabyldamaimyz. Kóp nárseni keshirýge bolady, biraq mundaidy emes. Onyń ústine eshqandai keshirim týraly áńgime bolýy múmkin emes", - dep qosty marqumnyń ápkesi.
Eske sala keteiik, 9 qarashada burynǵy ulttyq ekonomika ministri Qýandyq Bishimbaevtyń elordadaǵy meiramhanalardyń birinde áielin uryp óltirgeni týraly taraǵan habar qoǵamda rezonans týdyrǵan edi.
Astana qalasynyń Politsiia Departamenti sol kúni meiramhanadaǵy janjaldyń saldarynan alǵan dene jaraqattarynan bir áieldiń qaitys bolǵanyn rastaǵan. Alaida oqiǵaǵa qatysty qandai da bir aqparat bergen joq: zardap shegýshiniń atyn ataǵan joq.
Keiinnen Ishki ister ministrligi Astana meiramhanasyndaǵy kisi ólimi boiynsha Qýandyq Bishimbaevtyń ustalǵanyn rastady.
Sondai-aq Bishimbaevqa qatysty 2 ai merzimge qamaýǵa alý týraly bultartpaý sharasy taǵaiyndaldy.
Budan bólek eks-ministr áieliniń ólimin tergeý barysynda oqiǵa bolǵan "Bau" meiramhanasy ornalasqan Gastro ortalyq direktory qylmysty jasyrdy degen kúdikke ilinip, ýaqytsha ustaý izoliatoryna qamalǵan bolatyn.
