Foto: Astana qalasy Qylmystyq ister jónindegi mamandandyrylǵan aýdanaralyq soty
Kópshiliktiń nazaryn aýdarǵan atyshýly Bishimbaevtyń soty aiaqtalýǵa jaqyn. Astana qalasynyń qylmystyq ister jónindegi mamandandyrylǵan aýdanaralyq sotynda ótip jatqan sot protsesinde búgin eki aiyptalýshy – Qýandyq Bishimbaev pen Baqytjan Baijanov sońǵy sózin aitty, dep habarlaidy «Ul aqparat».
Qýandyq Bishimbaev buǵan deiin alǵa tartqan faktilerdi taǵy bir márte eske salyp, Saltanat Núkenovany qatygezdikpen óltirmegenin jetkizdi.
Sóz arasynda Ekinshi dúniejúzilik soǵys kezinde fashistik Germaniianyń nasihat ministri bolǵan Gebbelstiń «ótirik sumdyq bolǵan saiyn oǵan sený ońai» degen pikirin qosyp, áleýmettik jeliler arqyly búkil qoǵam ózin qaralap jatqanyn atap ótti.
«Men kinálimin. Moiyndaimyn. Biraq qasaqana óltirgen joqpyn. Men Saltanattyń jáne ózimniń týǵan-týystarynan keshirim surap, alqa biler ádil sheshim shyǵaratynyna senem», - dedi Bishimbaev.
Baqytjan Baijanov ta sottaǵy sońǵy sózin aityp, Saltanattyń ólimin jasyrý bylai tursyn, ólim aýzynda jatqanyn bilmegenin alǵa tartty.
«Iá, qyzmetkerlerdi úilerine qaitaryp, meiramhanany jaýyp, beinejazbalardy óshirýdi buiyrǵanymdy jasyrmaimyn. Biraq men sol kezde aýyr qylmys jasalǵanyn bildim be? Ant etemin. Bilmedim. Eger bilgende qylmysty jasyrý áreketteriniń eshqaisysyn jasamaityn edim. Saltanattyń týǵan-týystarynan taǵy da keshirim suraimyn. Jatqan jeri jaily bolsyn», – dedi Baijanov.
Sot protsesi 10 mamyrda jalǵasady.
