Astanada Saltanat Núkenovanyń ólimine qatysty sot protsesi jalǵasyp jatyr. Qýandyq Bishimbaev sotta jaýap berýin jalǵastyrdy, dep habarlaidy "Ult aqparat" kaz.nur.kz saityna silteme jasap.
Buǵan deiin Qýandyq Bishimbaev Saltanat Núkenova qaitys bolǵan kúni olar "Gastroortalyqqa" kelip, sol jerde araqatynastaryndaǵy máseleni sheshýdi jalǵastyrǵandaryn aitqan.
"Ol divanǵa jatyp qaldy da (osy qalpynda – red. eskertpesi), men biraz ýaqyt emotsiiaǵa berilip, zattardy laqtyryp júrdim. Esim shyǵyp, ne bolyp jatqanyn túsine almadym, bul jaǵdaiym shamamen 10 minýtqa sozyldy. Men janyndaǵy divanǵa otyrdym, al Saltanat sol kúii jata berdi. Osylai biz bir saǵat ótkizdik: ol demalyp jatty, men únsiz temeki shegip otyrdym. Men oǵan demalýǵa jáne qalpyna keltirýge ýaqyt bereiin dep oiladym.
Terezege qarap edim, tań atyp kele jatqanyn túsindim. Táýliktiń qai kezi ekenin túsinbedim. Saǵatyma qarap edim, jeti shamasy eken. Men úige qaitýymyz kerek ekenin túsindim. Men jeidesizbin, ol paltosyn OKZ-da qaldyryp ketken edi, jalańash denesine meniń kúrtem jabylǵan. Bul jerden qalai ketemiz dep oilap júrmin. Bulai taksimen júrý uiat dep oiladym. Kólikte qosymsha kiimderim – satyp alǵan jeidem men Saltanattyń zattary bar ekenin múlde umytyp kettim", - dep áńgimesin jalǵastyrdy Bishimbaev.
Odan ári Bishimbaev Saltanatty asyqtyrǵanyn aitty. Ol ózderiniń qalai shyǵyp ketetinine alańdaǵanyn aitty. Bul kezde saǵat tańǵy jeti bolǵan.
"Adamdar kóshede júre bastaidy, sondyqtan kóshege múldem shyǵý bolmaidy. Men ony oiattym, ol ornynan turdy. Sol kezde onyń beti qyzaryp ketken edi, biraq áli kógergen joq, azdap isik paida bolǵan. Biz VIP-bólmeden shyqtyq, men ony asyqtyrdym, biz aldymen turaqqa tústik. Men ol jerde kúzetshi bar dep oiladym, kóshege shyqpasymyz úshin turaqqa taksi shaqyrýyn ótingim keldi, sebebi ústimizdegi kiim endi... meniń jeidem joq, al ol tek kýrtkamdy kigen. Biraq men ol jerden kúzetshini tappadym. Ony izdep, kólik turaǵyn aralap shyqtym. Biraq ony tappadym, sondyqtan biz shyqtyq. Men "jaraidy, kólikti ózim júrgizemin" dep oiladym. Mas ekenimdi túsindim, biraq bul kúide qaida bararymdy bilmedim. Men Saltanyń qolynan ustap, kólikke bardyq", - deidi jaýapker.
Biraq Bishimbaev kólikpen endi qozǵala bastaǵan kezde óziniń mas ekenin túsinip, "birdeńe búldirip qoiamyn ba dep oilaǵanyn" aitty. Keiinirek, sottalýshynyń aitýynsha, Saltanat onyń ashýyn keltirgen.
"Men burylyp qaradym, ol "iá, men osylai bolǵanyn qaladym" dedi, men onyń shashynan ustap, betinen tórt ret qatty shapalaqpen urdym: ekeýin sol qolymmen, ekeýin oń qolymmen. Ol qulap tústi. Men ashýlanyp: "Tur" dedim. Men taǵy da túsine almadym. Meniń kúiim mynadai boldy: ol muny ádeii istep jatyr ma, álde ózin nashar sezine me?" dep oiladym. Osy ýaqyt boiy onyń qandai kúide ekenin túsinbedim. Ol qulaǵan kezde ony jambasynan 3-4 ret teptim. Eshqandai mańyzdy múshesine soqqy jasamaýym kerek ekenin túsindim... Ashýmen ony tórt ret teýip: "Tur, tur, ne istep jatyrsyń?" dedim. Ol ornynan turmady, men ashýlanyp, shashynan tartyp kóterdim", - deidi Bishimbaev.
Aiypker buǵan deiin "BAU" meiramhanasyna qalai kelgenderin jáne ne bolǵanyn aityp bergen edi.
