Ótken aptada burynǵy kúieýi uryp-soqqan áiel oqiǵanyń mán jaiyn baiandady. Óz kezeginde burynǵy kúieýi de beine úndeý joldady, dep habarlaidy «Ult aqparat».
Eske sala keteiik, ótken aptada áleýmettik jelilerde Almatyda áieldi aiaýsyz uryp-soqqany beinelengen video paida boldy.
Belgili bolǵandai, áieldiń esimi Saltanat. Ol 11 jyldyq nekeden keiin ajyrasýdy uiǵarǵan.
«Men 11 jyl abiýzermen nekede boldym, bizdiń tórt balamyz bar. Osy jyl aralyǵynda ol meni rýhani da, fizikalyq turǵyda da qinap keldi. Keiingi jyly onymen birge ómir súrý qiyndap ketti. Urý men qorlaý jiilep, tipti qatańdap ketti. Men bul adamnan qorqamyn. Bul adam burynǵy politsiia qyzmetkeri jáne zańger, onyń tanystary kóp, bárin bir qońyraýmen sheshedi jáne kimdi bolsyn «satyp alamyn» dep oilaidy. Sondyqtan osy isi úshin ol laiyq jazasyn alýy kerek», - dep jazdy áiel.
Burynǵy kúieýi ony jaiyna qaldyra ma degen úmitpen Saltanat Almatyǵa kóship ketken. Alaida, aitýynsha, ol ara-tura kelip turady jáne qaita qosylýǵa úgittep júrgen.
«Sol kúni ol maǵan kelip, oǵan qaityp oralýymdy surady, biraq men kelispegen soń ol ashýlanyp, uialy telefonymdy jerge uryp shaǵyp tastady. Telefonymdy qoqys jáshiginen alyp jatqanymda ol maǵan qatty soqqy jasady. Soqqy alǵannan keiin uzaq ýaqyt esimdi jiia almai jattym. Osydan keiin 102 shaqyryp, ústinen aryz jazdym. Biraq 8 kún ishinde quqyq qorǵaý organdarynan esh áreket kórmedim. Osy video jelige taralǵannan keiin olar iske qosyldy. Meniń basym jaraqattandy jáne bas mi jumsaq tinderiniń jaraqaty boldy. Biraq is qozǵalýy úshin bir jerim kógerýi kerek eken nemese bir jerim synýy kerek eken», - dep jazdy ol.
Óz kezeginde Saltanattyń burynǵy kúieýi Kim Aleksandr beine úndeý joldady. Ol keshirim surap, jaǵdaidyń qalai bolǵanyn óz tarapynan túsindirdi. Er adamnyń aitýynsha otbasylyq jup árbir jup siiaqty urysyp, tatýlasyp otyrǵan. Buǵan deiin de janjaldasyp, bir-birinin zattaryn laqtyryp, syndyrǵan.
«3 sáýir 2024 jyly men Almatyǵa Saltanatqa bardym. Biz kezekti ret otbasymyzdy saqtap qalmaq boldyq. Ol meni kútti jáne jolda abai bolýymdy surady. Kelgen soń biz kezdestik, bári jaqsy bolatyn. Úige kireberiste men onyń telefonyn suradym, onyń jáne balalardyń sýretterin kórmekshi boldym. Sol kezde onyń bir jigitpen túsken sýretin kórdim. Men qatty ashýlanyp kettim. Onyń qyzǵandym. Sóitip telefonyn jerge shaqtym», - dedi ol.
Aleksandrdyń aitýynsha, ol ony urmaǵan, jai ǵana qolyn sermep qalyp, iterip jibergen.
Almaty politsiiasy osy derek boiynsha tekseris júrgizilgenin aitty. Jinalǵan materialdar sotqa jiberildi.
