2025 jylǵa deiin Qazaqstannyń Ulttyq biliktilik júiesi halyqaralyq deńgeide moiyndalatyn bolady. Bul týraly búgin Salalyq kásiptik standarttardy ázirleý máseleleri boiynsha biliktilik jónindegi ulttyq keńes otyrysynda QR Eńbek jáne halyqty áleýmettik qorǵaý ministri Birjan Nurymbetov aitty, dep habarlaidy QazAqparat.
«Ulttyq biliktilik júiesiniń negizgi maqsaty - elimizde ekonomikanyń talabyna, eńbek naryǵyna sai sapaly, bilikti kadrlar daiyndaý. Bul júieniń qurylymy qarapaiym, úsh túiinnen turady. Eń bastysy - biznes ókilderi, jumys berýshiler bilim berý júiesine sol mamannyń bilimi, biliktiligi, daǵdysy jóninde talabyn qoiýy. Ony kásiptik standart deimiz. Ekinshiden, sol kásiptik standarttarǵa bilim júiesindegi standarttary ne baǵdarlamalary beiimdelýi, bolmasa jasaqtalýy kerek. Úshinshisi, bizde qazir bilim berý oshaǵy ózi oqytady, diplom beredi. Órkenietti elderde ony Táýelsiz baǵalaý ortalyqtary beredi. Bizde de sony qurý qajet», - dedi ministr.
Onyń dereginshe, ulttyq biliktilik júiesin damytý eki baǵytta júrgizilip jatyr. Birinshi baǵytta biylǵy jyldyń sońyna deiin el ekonomikasynyń 12 basym salasy boiynsha 36 salalyq biliktilik sheńberi men 480 kásiptik standarty daiyndalatyn bolady.
«Ekinshi baǵytta strategiialyq is-áreketterimizdi aiqyndaý úshin 2025 jylǵa deiingi Jol kartasyn ázirledik. Jol kartasyna sáikes sharalardyń eki kezeńi bolady. Birinshi kezeńde biz 2019-2020 jyldary kásiptik standarttardy ázirlep, olardy bilim berý protsesine engizýdi aiaqtaýǵa tiispiz. 2021-2025 jyldary biz zańnamalyq baza qalyptastyryp, biliktilikterdiń halyqaralyq tanylýyn qamtamasyz etýimiz qajet», - dedi Birjan Nurymbetov.
