Eńbek jáne halyqty áleýmettik qorǵaý ministri Birjan Nurymbetov 42500 teńgelik áleýmettik tólemge bailanysty el ishinde týyndap jatqan suraqtarǵa jaýap berdi, dep habarlaidy "Ult aqparat".
«42 500 teńgelik tólemniń ózi jaiynda túsindire keteiin. 42500 teńge ai saiyn ári bir ret tólenedi. Máselen, tótenshe jaǵdai rejimi taǵy bir aiǵa (15 mamyrǵa deiin) uzartylsa, 42 500 teńge taǵaiyndalǵan adamdar ony 15 sáýirden keiin de ala beredi. Sonymen qatar sizge qaitadan ótinish berýdiń qajeti joq. Biz tólemdi avtomatty túrde uzartamyz», - dep jazdy ministr Facebook paraqshasynda.
Ministrdiń túsindirýinshe bul tólem ai saiyn tolyq kólemde tólenedi. Iaǵni, mysaly áleýmettik tólem 14 sáýirde taǵaiyndalsa (iaǵni, tótenshe jaǵdaidyń birinshi aiynyń aiaqtalýyna bir kún qalsa da), onda ol tólem tolyq kólemde beriledi.
«Jeke tabys salyǵy, mindetti zeinetaqy jarnasy jáne basqa aýdarymdar 42 500 teńgeden ustalmaidy. Sondai-aq bankter men uiymdarǵa osy somadan qaryz óndirýge tyiym salynady (nesieler, kommýnaldyq tólemder jáne t.b. úshin). BJZQ-daǵy zeinetaqy jarnalaryna 42 500-den ustalmaǵanyna qaramastan, bul ailar bolashaqta bazalyq jáne birlesken zeinetaqy taǵaiyndaý kezindegi eńbek ótili retinde eskeriledi. Ótinish berýshi osy ailardaǵy tabysty ózine yńǵaily kez-kelgen ailarmen almastyra alady. 42 500 teńge tólemi ataýly áleýmettik kómek taǵaiyndaý kezinde kiristerge qosylmaidy», - deidi ol.
Birjan Nurymbetov sonymen qatar zeinetkerler men memlekettik járdemaqy alýshylar úshin tiisti tólem ai saiyn júrgiziletinin eske saldy.
«Zeinetaqy men memlekettik járdemaqy ai saiyn tólenedi. Ári qarai olarǵa 1 sáýirden bastap mólsherin indeksatsiialaý arqyly tolyq aqy tólenedi. Elde 4 millionnan astam adam jylyna 3,5 trillion teńgeni quraityn zeinetaqy men járdemaqy alyp otyr. Osylaisha atalmysh sanat úshin 42 500 teńge berilmeidi. Biraq eger zeinetker nemese múgedek tótenshe jaǵdai jariialaǵanǵa deiin memlekettik járdemaqy alyp júrse, iaǵni 16 naýryzǵa deiin ol resmi túrde jumys istegen bolsa (jumysker, jeke kásipker nemese BJT tóleýshisi bolǵan jaǵdaida), onda ol 42 500 teńgege ótinish bildire alady. Áitse de eger ol tótenshe jaǵdaidyń engizilýine bailanysty osy kirisin joǵaltqanyn kórsetýi tiis», - deidi ministr.
Al eger zeinetker nemese memlekettik járdemaqyny alýshy tótenshe jaǵdai aldynda resmi túrde jumys istemese, tótenshe jaǵdai jariialanǵannan keiin, iaǵni 16 naýryzdan keiin olarǵa 42 500 teńge bólinbeidi. Olarǵa BJT tólep, ótinish berý qajeti joq.
«Zańgerler tótenshe jaǵdaiǵa deiin resmi túrde jumys istegen zeinetkerleriń kirisin joǵaltýyna bailanysty 42 500 teńge ala almaityndyǵyn eske salyp jatyr. Óitkeni zań boiynsha zeinetkerler Memlekettik áleýmettik saqtandyrý qoryna (Memlekettik áleýmettik saqtandyrý qory, oǵan 42,500 tólenetin) áleýmettik jarnalar tóleýden bosatylady. Biz muny bilemiz. Bul máseleni túsindire keteiin. Azamat BJT tólegen kezde ol soma (2651 teńge) tórt tólemge bólinedi (jeke tabys salyǵy, biýdjetke tólenetin áleýmettik aýdarymdar, BJZQ-ǵa zeinetaqy jarnalary jáne meditsinalyq saqtandyrýǵa). Zańǵa sáikes, zeinetkerler memlekettik áleýmettik saqtandyrý qoryna áleýmettik jarnalardy tóleýden bosatylǵandyqtan (BJZQ men QQAJ tólemderinen de), BJT-nyń bar somasy biýdjetke - jeke tabys salyǵy retinde túsedi. Biraq zeinetkerler úshin biz erekshe áleýmettik jaǵdai jasaa, olar tólegen BJT-ny onyń resmi jumysy retinde moiyndadyq», - deidi ministr.
