Parlament Senatynyń jalpy otyrysynda «Qazaqstan Respýblikasynyń keibir zańnamalyq aktilerine halyqtyń jumyspen qamtylýy máseleleri boiynsha ózgerister men tolyqtyrýlar engizý týraly» Zańy eki oqylymda qabyldandy, dep habarlaidy QazAqparat tilshisi.
Zań jobasy ózin-ózi jumyspen qamtyǵan halyqtyń qyzmetin formalizatsiialaý jáne áleýmettik qamsyzdandyrý júielerine qatysýyn qamtamasyz etý maqsatynda ázirlengen. Ózgerister men tolyqtyrýlar 3 kodekske (Salyq, Kásipkerlik, Biýdjet kodeksteri) jáne 19 zańǵa engiziledi.
«Zań jobasynyń negizgi jańalyǵy beiresmi jumyspen qamtylǵandardyń qyzmetin 2019 jylǵy 1 qańtardan bastap salyq organdarynda tirkeýdiń jeńildetilgen tártibin kózdeitin jańa quqyqtyq rejimdi - Biryńǵai jiyntyq tólemdi (BJT) engizýdi qamtidy. Aǵymdaǵy jaǵdai kórsetkendei, beiresmi jumyspen qamtylýǵa salyq organdarynda tirkelý jáne esepten shyǵý kedergileri, tólem júieleriniń kóptigi jáne salyq rejimin anyqtaýdyń qiyndyǵy áser etedi. Beiresmi jumyspen qamtylǵandardyń qyzmetin tirkeýdi jeńildetý úshin Biryńǵai jiyntyq tólemdi engizý usynylady», - dedi QR Eńbek jáne halyqty áleýmettik qorǵaý ministri Mádina Ábilqasymova.
Onyń sózine qaraǵanda, BJT-ny tóleý beiresmi jumyspen qamtylǵandardyń qyzmetin tirkeýmen qatar, mindetti meditsinalyq jáne áleýmettik saqtandyrý, zeinetaqymen qamsyzdandyrý júielerine qatysýǵa múmkindik beredi. Biryńǵai jiyntyq tólem Qazaqstannyń jumys isteitin azamattary úshin 4 mindetti tólemdi bir rettik tólemmen almastyrady.
«BJT-ny tóleýshiler úshin kiris salyǵy jáne áleýmettik tólemder boiynsha eń tómen stavkalar respýblikalyq mańyzy bar qalalarda, Astanada jáne oblystyq mańyzy bar qalalarda 1 AEK (2525 teńge), basqa eldi mekenderdiń turǵyndary úshin - 0,5 AEK (1263 teńge) dep belgilendi», - dep naqtylady ministr.
Biryńǵai jiyntyq tólemniń úlesi: jeke tabys salyǵy - 10 paiyzdy; Memlekettik áleýmettik saqtandyrý qoryna áleýmettik aýdarymdar - 20 paiyzdy; Biryńǵai jinaqtaýshy zeinetaqy qoryna zeinetaqy tólemderi - 30 paiyzdy; Mindetti áleýmettik meditsinalyq saqtandyrý qoryna aýdarymdar - 40 paiyzdy quraidy.
«Biryńǵai jiyntyq tólemdi engizý nátijesinde, beiresmi jumyspen qamtylǵandar qataryndaǵy 500 myń adamnyń qyzmetin formalizatsiialaý kózdeledi, sondai-aq 65,4 myń tóleýshi patent jáne jeńildetilgen deklaratsiia negizinde qoldanystaǵy salyq rejiminen aýysady dep kútilýde», - dedi M. Ábilqasymova.
Jalpy alǵanda, Biryńǵai jiyntyq tólemdi engizý beiresmi jumyspen qamtylǵandarǵa: Mindetti áleýmettik meditsinalyq saqtandyrý júiesine qatysýǵa jáne somasy men túrleri shektelmegen meditsinalyq qyzmetterge qol jetkizýge, meditsinalyq mekemelerdi tańdaýǵa; jinaqtaýshy zeinetaqy júiesine qatysýǵa ári júiege qatysý ótiline qarai bazalyq zeinetaqy tólemin alýǵa; eńbek etý qabiletinen, asyraýshysynan aiyrylǵan jaǵdaiǵa, júktilik pen bosanýǵa, bala asyrap alýǵa, bala 1 jasqa deiin onyń kútimine bailanysty áleýmettik tólemder alýǵa múmkindik beredi.
Túzetýlerdiń ekinshi blogy «ózin-ózi jumyspen qamtyǵan adam» anyqtamasyna ártúrli túsinik berýdi joiýǵa baǵyttalǵan. Terminderdi biryńǵai qoldaný úshin «jumyspen qamtylǵan adam», «jaldamaly jumysker», «táýelsiz jumysker» anyqtamalary usynylady.
