Azamattardy qabyldaýdyń biryńǵai kúni 12 myńnan astam qazaqstandyq atqarý organdaryna júgindi, dep habarlaidy "Ult aqparat".
2019 jylǵy 21 qarashada Prezidenttiń «Halyq únine qulaq asatyn memleket» tujyrymdamasy aiasynda respýblika boiynsha «Azamattardy qabyldaýdyń biryńǵai kúni» ótken bolatyn. Shara aiasynda qala ákimi, qala ákimi orynbasarlary, basqarma basshylary men aýdan ákimderi azamattardy qabyldady.
Nátijesinde ortalyq memlekettik organdardyń birinshi basshylary jáne 47 qala, 179 aýdan jáne 2771 aýyldyq okrýg ákimderi turǵyndardyń aryz-shaǵymyn tyńdady.
Respýblika boiynsha qabyldaý organdaryna 12,6 myń adam júgindi, onyń 12,4 myńy – jergilikti atqarýshy organdarǵa, 172 adam – ortalyq memlekettik organdarǵa jáne 50 adam – QR Prezidenti Ákimshiliginiń qabyldaýyna jazylǵan.
Óńirler arasynda Almaty oblysynyń (1683 adam), Aqmola (1205) jáne Qostanai (1042) oblystarynyń turǵyndary belsendilik tanytqan. Olarmen salystyrǵanda Shymkent (128), Almaty (309) qalalary men Qaraǵandy oblysynda (354) júginýshiler sany óte az bolǵan.
Ortalyq memlekettik organdar arasynda eń kóp shaǵymdanýshylar Ishki ister ministrligine (101 adam), Eńbek jáne halyqty áleýmettik qorǵaý ministrligine (60 adam) jáne Densaýlyq saqtaý ministrligine (30 adam) barǵan.
Jergilikti atqarýshy organdarǵa kelip túsken ótinishteriniń 70% kommýnaldyq qyzmet, áleýmettik qorǵaý, turǵyn úi jáne jer qatynastary máselelerimen bailanysty bolǵan. Ortalyq memlekettik organdarda negizgi quzyretterimen bailanysty máseleler qozǵalǵan.
Áleýmettik máseleler boiynsha Eńbek jáne halyqty áleýmettik qorǵaý ministrligine turǵyndar qaryz júktemesiniń tómendeýi jáne Ataýly áleýmettik kómek (22 adam), kóp balaly analar (10 adam) jáne múgedekterdi qoldaý (16 adam) jóninde júgingen.
Jalpy, Biryńǵai qabyldaý kúni barlyq respýblikalyq jáne óńirlik BAQ-ta, áleýmettik jelilerde keńinen habarlandy. Ásirese, 92 jyl kýáliksiz ómir súrgen azamat, áleýmettik kómeksiz qalǵan SIM burynǵy qyzmetkerleri, aliment tóleý máseleleri BAQ-ta jariialandy.
Sondai-aq, Qostanai oblysynyń ákimi Arhimed Muhambetov Shoqan Ýálihanovtyń týǵan jerin naqty anyqtaý boiynsha tapsyrma berdi. Al pavlodarlyq oqýshy Elisei Resniaskii oblys ákimine tuzdy oblystyń geologiialyq beligisi etip bekitýdi jáne Ertis óńirindegi ár oqý ornynda týǵan jerge arnalǵan burysh ashýdy usyndy.
