Osy aptada pilottyq rejimde elimizdegi ár azamattyń elektrondy pasporty jasaldy. eGov.kz saityna kirý arqyly elektrondy jazbalaryńyzdy qarap, qandai meditsinalyq mekemeden qandai em alǵandaryńyz týraly málimet alýǵa bolady. Bul týraly Ortalyq kommýnikatsiialar qyzmetinde ótken baspasóz konferentsiiasynda QR Densaýlyq saqtaý ministri Eljan Birtanov aitty, dep habarlaidy Baq.kz agenttigi.
Elimizde tsifrlandyrý sharalary óte joǵary deńgeide júzege asyrylyp jatyr. Tsifrlandyrý - ár azamattyń meditsinalyq qyzmet alýy úshin, bul qyzmet túriniń sapasyn kóterý jáne dári-dármekpen qamtamasyz etý úshin kerek. Júieli tsifrlandyrý bolashaqta meditsinalyq áleýmettik saqtandyrý júiesin engizýge yqpal etedi.
"Bizdiń maqsat - ár adamnyń óziniń densaýlyq jaǵdaiy týraly málimetti portaldan kórip otyrýyna múmkindik berý. Jaqyn arada elektrondy pasporttardyń mobildi nusqasy daiyn bolady. Ol jerden osy ýaqytqa deiingi barlyq málimetti kóre alasyzdar. Al jańa jyldan bastap elektrondy pasporttar onlain rejimde jańartylatyn bolady", - deidi Eljan Birtanov.
Densaýlyq saqtaý ministri elektrondy pasporttyń ne sebepti onlain redimde jumys isteitinin túsindirdi.
"Bul - aqparattyń ashyqtyǵy úshin kerek. Tegin qyzmet kórsetetin kez kelgen meditsinalyq mekeme qujatty elektrondy formada toltyratyn bolady. Osy jumystar nátijesinde emhanalardyń jumysyn turaqtandyryp, qaǵazbastylyqtan aryla bastadyq. Eń bastysy - barlyq meditsinalyq qyzmet túrleri men tegin beriletin dári-dármekterdi tirkedik", - deidi ol.
Sondai-aq, Eljan Birtanov 2018 jyly tsifrlandyrýdyń arqasynda aitarlyqtai qarajat únemdelgenin aitty.
"Bul qarajat qajetti qosymsha dári-dármekterdi alýǵa jumsaldy. Budan bólek, tegin dári-dármek alýshylardy tsifrlandyrǵan kezde mynadai jaǵdai boldy: bir jylǵa 120 mlrd teńgeniń dári-dármegine tapsyrys bergen ákimdikter 14,5 mlrd teńgeniń dári-dármeginen bas tartty. Únemdelgen qarajat tiisti jerlerge: jańa meditsinalyq ýchaskeler men meditsinalyq jedel járdem qyzmetin qarjylandyrýǵa jumsaldy", - deidi ministr.
