foto: informburo.kz
Burynǵy densaýlyq saqtaý ministri Eljan Birtanov ózine qandai aiyp taǵylyp otyrǵanyn túsinbeitinin málimdedi. Bul týraly ol áleýmettik jelidegi paraqshasynda jazdy, dep habarlaidy "Ult aqparat".
«Dostar, ótken beisenbidegi sot otyrysynda prokýrorlar aiyptaý qorytyndysyn jariialaǵannan keiin, kópshiliktiń kókeiinde bir suraq qaldy. «Ne úshin aiyptap otyr, túsinbedik?» dep menen suraidy.
Men de túk túsinbedim. Ózderińiz baǵalańyzdar:
1) Qylmys oqiǵasy – 2018 jyly jumys istemeitin platformany qabyldaý. Biraq is materialdaryna qarasaq, platformany jasaýshy (Erikson kompaniiasy) ony joqqa shyǵarady. Iaǵni, platformanyń qoldanýǵa jaramdy ekenin aitady. Al sot saraptamasy aiypty rastamady.
2) Qylmystyq áreket – qyzmettik ókiletti asyra paidalaný. Degenmen is materialdarynda buǵan dálel joq. Onyń ústine, platformany qabyldaý jáne tóleý meniń quzyretime kirmegen.
3) Qylmystyń motivi – memlekettik qyzmetshiniń tiimdi imidjin qalyptastyrý. Negizi bul memlekettik qyzmetshiniń mindetine kirýi tiis nárse ǵoi. Oǵan qosa, taǵylǵan aiypqa eshqandai dálel joq.
Eń bastysy – iste meniń qandai da bir materialdyq paida nemese artyqshylyq kórgenimdi aiqyndaityn eshqandai dálel joq.
4) Memleketke 4 million dollardan astam qarajat kóleminde ziian keltirý (jumys istemeitin platformany qabyldaý). Aiyptaý qorytyndysynda biylǵy tamyzda platformany iske qosý josparlanǵany aitylǵan. Iaǵni, eshqandai zalal kelmegen.
Bul az deseńiz, Densaýlyq saqtaý ministrliginiń de, Qarjylyq monitoring agenttiginiń de platformany ázirleýshige eshqandai shaǵymy joq ekeni anyqtaldy. Jábirlenýshiler men aiyptaýshylar, kompaniia platformany qaita jasap shyqty ma, álde joq pa? Osylardy kóre otyryp, aiyptyń mánin qalai túsinesiń?..», - dep jazdy ol.
Eks-ministrdiń sózinshe, ol sýdiadan muny túsindirýdi suraǵan, degenmen Ibragim Álkenov jaýap bere almaǵan.
«Ol isti qaraýǵa qabyldaǵanymen, ózi de aiypty túsinbeitin sekildi», - deidi Birtanov.
