Densaýlyq saqtaý ministri Eljan Birtanov Qazaqstanda sanitarlyq-epidemiologiialyq qyzmet úshin kadrlardy daiarlaýdy reformalaý boiynsha keńes ótkizdi. Bul týraly atalǵan vedomstvonyń Telegram-kanalynan málim boldy, dep habarlaidy "Ult aqparat".
Selektorlyq rejimde ótken keńeske atalǵan vedomstvonyń vitse-ministrleri, qurylymdyq bólimsheler men uiymdardyń basshylary, meditsinalyq JOO rektorlary, ǵylymi ortalyqtar direktorlary jáne salaǵa qatysty ózge de uiym ókilderi qatysty.
Densaýlyq saqtaý ministrligi sanitarlyq-epidemiologiialyq qyzmetti kadrlarmen qamtamasyz etý úshin qysqa ári orta merzimderge arnalǵan sharalardy usyndy.
Qysqa merzimde sharalar aiasynda bakalavriattaǵy 120 túlekti sanitarlyq dárigerlikke (epidemiologtar), qoǵamdyq densaýlyq saqtaý mamandyǵyna jáne gigienashylyqqa mamandandyrý eskerilgen. Ol úshin stýdentter epidemiologiianyń qosymsha saǵattaryn igerýi tiis.
Aita keteiik, ministrlik qysqa merzimde epidemiologiialyq qyzmet boiynsha 300 mamandy qaita daiarlaýdy jáne 9 myń meditsina qyzmetkeriniń biliktiligin arttyrýdy josparlap otyr.
Budan bólek, orta merzimdegi sharalar aiasynda úshinshi kýrstan bastap bilim berý traektoriialary turǵysynda (epidemiologiia jáne gigiena) «qoǵamdyq densaýlyq saqtaý» mamandyǵynyń stýdentteriniń profilizatsiia sharasy usynyldy. Beiindi magistratýrada epidemiologiia, gigiena, densaýlyq saqtaýdaǵy menedjment mamandyqtary boiynsha daiarlaý josparlanýda. Doktorantýrada ǵylymi-pedagogikalyq kadrlardy maqsatty daiarlaý jalǵasady.
Keńes barysynda respýblikalyq sarapshylar kadrlar daiarlaýdy reformalaý jáne sanitarlyq-epidemiologiialyq salada qyzmetkerlerdiń áleýetin arttyrý boiynsha sharalar josparyn talqylady.
