Burynǵy densaýlyq saqtaý ministri Eljan Birtanov BAQ ókilderimen zým arqyly bailanysqa shyǵyp, ózine qarsy jasalǵan aqparattyq shabýyldyń negizsiz ekenin málim etti, dep habarlaidy Ulysmedia.kz.
Aita ketsek kúni keshe telegram-arnalardyń birinde Eljan Birtanovqa qatysty aqparat taratylǵan bolatyn. Ondaǵy málimette osydan eki jyl buryn Eljan Birtanov Tarazda júrgen kezinde koronavirýs juqtyrǵany jazylǵan.
«Birtanov sol kezde Tarazdaǵy kez kelgen infektsiialyq aýrýhanada oqshaýlanýy kerek edi. Alaida sheneýnik zań qaishylyǵyna qaramastan astanaǵa jetý úshin sanaviatsiia bortyn paidalanǵan. Negizi saniaviatsiia ushaǵy onkologiiamen aýyrǵan, qos ókpeden pnevmoniiaǵa ushyraǵan áieldi alyp ketýi kerek bolatyn. Alaida patsient astanaǵa jete almady. Onyń ornyna ushaqpen ministr ketti. Birtanov shyn máninde, aýrý áieldiń jaǵdaiyn paidalanyp, falsifikatsiiaǵa bardy. Birtanovtyń bul turǵyda moraldyq qaǵidattary týraly ne deýge bolady? Áiel keiin qaitys boldy. Sonda álgi áieldiń ómirinen Birtanovtyki artyq boldy ma?» - dep aqparat taratqan telegram-arna.
Bul máseleniń jala ekenin aitqan eks-ministr búgin BAQ ókilderimen zým arqyly júzdesti. Eljan Birtanov keshegi aqparat shynynda da júregine batqanyn aitady.
«Árine, ol tolyq ótirik. Osyǵan bailanysty keshe óz qorǵaýshylarymmen aqyldasyp, Bas prokýratýraǵa aryz jiberdim. Sebebi jalǵan aqparat taratý – zańbuzýshylyq. Tikelei aitqanda, Qylmystyq kodekstiń 274-baby buzylyp otyr. Prezident ákimshiligine de shaǵym jiberdim. Sebebi buryn osyndai fakttar boiynsha politsiiaǵa aryz jibergenmin. Biraq eshqandai shara qabyldanǵan joq. Keshe eki jarymda sot bastalǵanda sýdia Álkenovke de osy máseleni aittym. Óitkeni meniń oiymsha, sot tóraǵasy osyndai aqparatqa bailanysty mindetti túrde óz sheshimin qabyldaýy kerek edi», - deidi Eljan Birtanov.
Eks-ministr sot bastalǵaly mundai aqparattyq shabýylǵa buryn da ushyraǵanyn aitady. Sýdia munyń aldynda tiisti sheshim qabyldamaǵannan keiin belgisiz adamdar qoryqpai, jalǵan aqparatty taǵy taratqan. Eks-ministr sýdianyń ózine osylai degenin jetkizdi.
«Bas prokýratýraǵa meniń ótinishim tirkeldi. Ary qarai qajetti sharalar engiziledi dep senemin. Qalai zertteletinin bilmeimin. Sanaviatsiia boiynsha eshqandai fakt nemese qylmys tirkelgen joq. Keshe sotta ony biz talqylaǵan joqpyz. Men Tarazdan astanaǵa basqa naýqasqa arnalǵan ushaqpen ushtym degen eshqandai aqparat bolǵan joq. Ondai fakt joq. Bolsa men burynnan-aq múmkin túrmede otyrar edim. Árine, bul óte kúrdeli ári aýyr aiyp. Ondai aiyptaý is materialdarynda tigilmegen», - dedi ol.
Eljan Birtanov sottaǵy kýágerler «Birtanovtyń Tarazdan Nur-Sultanǵa kelýi zań aiasynda bolǵanyn aitqanyn, ondai quqyǵy barynyń jetkizgenin» atap ótti.
«Mundaǵy negizgi maqsat – bizdiń qoǵamda Birtanov jáne Ábishevtiń obrazyn qylmysker, jemqor retinde kórsetý, halyqty soǵan sendirý dep oilaimyn. Biraq men sot ashyq bolsyn, barlyq BAQ qatyssyn dep ótindim. Osyndai ótirikti kim taratty?» - deidi ol.
Eljan Birtanov ózine jasalǵan aqparattyq shabýyldy sot sheshimine áser etý amaly dep qarastyrady.
«Bul - meniń oiym. Bul máseleni quqyq qorǵaý organdary qarastyrýy qajet. Kim tapsyrys berýi múmkin? Bárińiz bilesizder, bul qylmystyq isti bastaǵan – Qarjy monitoringi agenttigi. Basynan bastap bul agenttiktiń tergeýi kóp buzýshylyqpen, zańsyzdyqpen ótti. Ol barlyqtaryńyzǵa málim. Sebebi sot tóraǵasy Álkenov te, basqa da sottar buzýshylyqtardy kórip, túzetý úshin óz sheshimderin bergen. Ókinishke qarai túzetilgen joq. Árine, tergeý organy buzýshylyqpen eki jyl boiy tergeý jasap, isti sotqa tapsyrǵannan keiin olar árine, meniń oiymsha qorqyp otyr. Erteń shyndyq shyǵyp, sot meni aqtasa, olarmen ne bolady? Olar qyzmetten bálkim, ketedi, qandai da basqa olarǵa aiyp qosylady bálkim, kim biledi. Olardyń motivi bar. Maǵan da da ártúrli aqparat jetip jatyr. Úiqamaqta otyrsam da, jumysqa shyǵam. Áriptesterimmen aralasam. Osyndai fakttar bar dep oilaimyn», - dedi ol.
Eske sala ketsek 2016 jyly Horvatiianyń Ericsson Nikola Tesla bailanys operatory Qazaqstan Respýblikasynyń Densaýlyq saqtaý ministrligimen meditsinalyq aqparat portaly týraly kelisimge kelgen bolatyn. Kelisim quny 20 million eýrony qurady. «Ericsson» Qazaqstanǵa densaýlyq saqtaýdyń aqparattyq júiesin ulttyq deńgeige jetkizýge kómektesýdi mindetine alǵan. Tapsyrmany oryndaý úshin bir jyl qajet boldy, sonymen qatar paidalanýshylar úshin jetkizýshiniń qosymsha úsh jyldyq qoldaýy qajet edi.
Joba 2018 jyly aiaqtalyp, ony sol kezdegi Qazaqstannyń Densaýlyq saqtaý ministri Eljan Birtanov bekitken. Ol 2020 jyldyń maýsymynda otstavkaǵa ketti. Biraq sol jyldyń sońynda tsifrlandyrý qorynan 445 myń eýro jymqyrdy degen kúdikpen qamaýǵa alyndy.
