QR Densaýlyq saqtaý ministri Eljan Birtanov meditsinalyq qural-jabdyq shyǵaratyn qazaqstandyq «BARK Tehnolodji» kásipornyna bardy, dep habarlaidy "Ult aqparat" DSM baspasóz qyzmetine silteme jasap.
Álemde ókpeni jasandy jeldetý apparaty jetispei jatqan kezde QR Densaýlyq saqtaý ministrligi qazaqstandyq kásiporyndarǵa otandyq meditsina jabdyǵyn shyǵarýdy usyndy. «BARK Tehnolodji» kompaniia osy jazda elimizdegi jansaqtaý bólimderine ózi jasaǵan ókpeni jasandy jeldetý apparaty legin jetkizýdi kózdep otyr.
Kompaniia málimetinshe, konstrýktor biýrosy birneshe jyldan beri osy salada mamandandyrylǵan sanattaǵy apparatty jobalaýdy júrgizip keledi. Ony shyǵarý 2021 jylǵa josparlanǵan. Alaida jahandyq pandemiia jáne daǵdarys kezinde ony shyǵarýdy bir jylǵa jyldamdatý jóninde sheshim qabyldanǵan.
Bas konstrýktor bóliminde bolashaq ókpeni jasandy jeldetý apparatynyń týrbinasynyń jumysy men aýa jiberý úrdisi ministrge eýropalyq ÓJA óndirýshi lider kásiporynnyń jabdyǵymen salystyryla otyryp kórsetildi.
Eljan Birtanov jasalatyn taýar sapasy boiynsha meditsina mamandarynyń talabyna sáikes kelse jáne import balamalaryna qaraǵanda baǵasy tómen bolsa otandyq óndirýshini qoldaýǵa ázir ekenin aitty.
