QR Úkimetinde ótken baspasóz konferentsiiasynda QR densaýlyq saqtaý ministri Eljan Birtanov Qazaqstan turǵyndaryn koronavirýs infektsiiasynan qorǵaý boiynsha qabyldanyp jatqan sharalar týraly aityp, aýrýdyń aldyn alý týraly usynymdarymen bólisti, dep habarlaidy "Ult aqparat".
«Búgingi tańda Qazaqstanda koronavirýs infektsiiasy joq. Ministrlik qabyldap jatqan sharalar birinshi kezekte el aýmaǵyna infektsiianyń ákelinýiniń aldyn alýǵa baǵyttalǵan. Osy maqsattarda bizdiń azamattardyń da, qazir koronavirýs infektsiiasy boiynsha qolaisyz elder sanatyndaǵy elderden keletin azamattardyń da kelýin shekteý boiynsha asa salmaqty qaýipsizdik sharalary qabyldandy. Bul elderdi biz infektsiianyń taralýyna bailanysty birneshe sanatqa jiktedik», — dedi E. Birtanov.
Onyń aitýynsha, azamattardyń kelýin shekteýden basqa, barlyq kelgen adamdardy 14 kún boiy karantinge alý sharasy qabyldanady.
«Inkýbatsiialyq kezeńde biz bul adamdardyń aýrýdy juqtyrmaǵanyna senimdi bolýymyz kerek, sondyqtan da arasynda juqpaly aýrýdy taratýshylar bolsa degen qaýippen úshinshi tulǵalarmen bailanys jasaý shekteledi. Bul barlyq elderde qoldanylatyn ádettegi sharalar», — dedi densaýlyq salasynyń basshysy.
Málimetterge sáikes, búginde shamamen 1 mln adam elge oraldy, eger olardyń arasynda naýqas adamdar bar bolǵan bolsa (temperatýrasy kóterilgen nemese aýamen juǵatyn infektsiia sipattarymen), onda olar mindetti túrde aýrýhanaǵa jatqyzylyp, tiisti tekserýden ótkizilip, emdeledi.
«Olardyń ishinde 185 adam bar, onyń 165-i aýrýhanadan shyǵaryldy, 20 adam qaldy. Kún saiyn patsientter kelip túsip jatyr, biraq olardyń ishinde koronavirýs juqtyrǵandar anyqtalmady. Jaǵdai baqylaýǵa alynǵan, dúrbeleń týdyrýdyń qajeti joq. Qazir bizdi alańdatyp otyrǵan negizgi másele – jalǵan aqparattar, feikter. Resmi aqparatty Densaýlyq saqtaý ministrliginiń Taýarlar men qyzmetterdiń sapasy men qaýipsizdigin baqylaý komitetiniń saitynan nemese 1406 bailanys ortalyǵyna habarlasý arqyly alýǵa bolady»,— dedi E. Birtanov.
Sonymen qatar, densaýlyq saqtaý ministri infektsiianyń aldyn alý sharalaryn atap ótti. Usynymdardyń kez kelgen ádettegi virýstyq infektsiia kezinde usynylatyn áreketterden esh ózgerisi joq.
«Bul – óz densaýlyǵyn qadaǵalaý, jeke gigienany muqiiat saqtaý, óitkeni infektsiia aýa-tamshyly jolmen beriledi. Turaqty gigiena, bet pen qoldy jii jýý – eń jaqsy tásil. Sonymen qatar, koronavirýstyq infektsiia tirkelgen elderge qajetsiz saiahattap barýdan aýlaq bolý kerek, temperatýrasy joǵary adamdarmen bailanysqa túspeýge tyrysý qajet. Sonda aýyryp qalmaýǵa bolady», — dep túiindedi densaýlyq saqtaý ministri.
