Densaýlyq saqtaý ministri Eljan Birtanov meditsina saladaǵy áriptesterine úndeý tastady, dep habarlaidy "Ult aqparat".
«Men búgin táýlik boiy jumysta júrgen, qańtar aiynan beri demalys kórmegen barlyq deńgeidegi meditsinalyq qyzmetkerlerge, dárigerler men medbikelerge, sanitarlar men meditsinalyq uiymdardyń basshylaryna, sanitarlyq qyzmettegilerge, ýniversitetter men ǵylymi ortalyqtardyń jetekshilerine úndeý tastaǵym keledi. Kóbińizdiń qaljyrap, sharshaǵandaryńyzdy, emotsionaldyq turǵyda ábden qinalǵandaryńyzdy túsinemin. Kóbińiz úige baryp, balalaryńyzdy qushaqtai almai otyrsyzdar. Úreilenip te júrsizder. Aralaryńyzda juqtyryp alǵandar da bar», - dep jazdy Eljan Birtanov facebook paraqshasynda.
Ministr meditsinalyq qyzmetkerler qanshama qinalsa da, adamdardy qutqarý úshin tańerteń turyp, jumysqa baratynyn eske saldy.
«Aqsha nemese abyroi úshin emes, jumysyńyz sondai bolǵannan keiin adamdardyń ómirine arasha túsip júrsizder. Men sizdermen maqtanamyn!» - dedi ministr.
Eljan Birtanov meditsina salasynyń qyzmetkerlerimen sózimen ǵana emes isimen de kómektesip júrgen jandarǵa, qarttarǵa dári-dármek pen tamaq aparyp júrgen, maska tigip, kerekti júkter úshin ushaq aqshasyn tólep júrgen, internet arqyly kontsert bergen, tipti jai ǵana úiinde karantinge otyrǵan adamdarǵa alǵysyn aitty.
«Ókinishke qarai, qazir qaidaǵy bir «sarapshylar», karantinde ishi pysqan «mamandar» men divan synshylary paida boldy. Olar áleýmettik jeliler men jańalyqtar legin «qoqys» aqparattarmen, túsiniksiz baǵalarmen, orynsyz boljamdarmen jáne oisyz keńestermen toltyryp tastady. Sabyrǵa kelip, olarǵa mán bermeýlerińizdi, ózderińizdi kásibi turǵyda ustaýlaryńyzdy suraimyn. Ondai adamdardyń sózderin júrekke jaqyn qabyldamańyzdar», - deidi ol.
Ministrdiń aitýyna qazir búkil el eń kúrdeli kezeńge aiaq basqan.
«Qazir bizden shydamdylyq pen kásibi áreket qana talap etiledi. Búgingi kúni biz jumysqa ǵana bar nazarymyzdy aýdarýymyz kerek. Eski ókpeni byqsytyp, kikiljiń shyǵaryp jatatyn ýaqyt emes. Epidemiianyń beti qaitqannan keiin máseleniń bárin sheshermiz. Ol úshin barymyzdy salamyz. Ýaqyt óter – epidemiia keter. Búgingi kún týraly kitap ta jazylyp, filmder túsiriler... Kóbi osy kúndi umyt qaldyrar. Biraq dál osyndai qiyn kezeńde kúndiz-túni, aptalap, ailap aýrýhanada SIZDERDIŃ bolǵandaryńyzdy este saqtańyzdar. SIZDER – búgingi kúnniń batyrysyzdar! Bul virýsty jeńerimizge senemin. Ony siz ben bizdiń kásibiligimiz, ǵylymymyz ben tártibimiz jeńedi. Ózderińizdi saqtańyzdar», - dep túidi Eljan Birtanov.
