QR Densaýlyq saqtaý ministrliginiń alqa otyrysynda mindetti áleýmettik meditsinalyq saqtandyrýǵa daiyndyq jumystary talqylandy. Aita keteiik, MÁMS 2020 jyldyń 1 qańtarynan bastap tolyq iske qosylady, dep habarlaidy "Ult aqparat" ministrliktiń baspasóz qyzmetine silteme jasap.
Alqa otyrysyna Senat pen Májilistiń depýtattary, QR DSM Qoǵamdyq keńesiniń ókilderi, meditsinalyq qyzmettiń sapasy boiynsha birikken komissiianyń, biznes keńestiń músheleri, oblystardyń, respýblikalyq mańyzy bar qalalardyń jáne Astanadaǵy Densaýlyq saqtaý basqarmasynyń, TKQSBK, MÁMSQ, REDO aimaqtyq filialdarynyń, vedomstvoǵa qarasty uiym basshylary qatysty.
Meditsinalyq saqtandyrý qory basqarmasynyń tóraǵasy Aibatyr Jumaǵulov densaýlyq saqtaý salasyn qarjylandyrý kólemi aitarlyqtai artqanyn aitty. Máselen, 2020 jyly ambýlatoriialyq-emhanalyq kómekti qarjylandyrý 78% ósedi, iaǵni 740,9 mlrd teńgege bólinedi, konsýltatsiialyq-diagnostikalyq qyzmetterge - 169 mlrd. teńge qarastyrylǵan, onyń ishinde 18 mlrd teńge mektep meditsinasyna baǵyttalady, emhana deńgeiinde meditsinalyq ońaltýǵa -16,6 mlrd teńge bólinedi, TMKKK sheńberinde jáne MÁMS júiesi boiynsha ambýlatoriialyq dári-dármekpen qamtamasyz etý 2 ese artady da, jalpy shyǵyn 197 mlrd teńgege jetedi.
Jalpy, 2019 jyly halyqqa meditsinalyq kómek kórsetý biýdjeti MÁMS esebinen 51% artty nemese 580 mlrd teńgege ósti.
Sondai-aq, ol meditsinalyq uiymdardy tehnikamen jabdyqtaý, infraqurylym jáne kadrmen qamtamasyz etý máselesine nazar aýdardy.
Alqa jiynynda densaýlyq saqtaý júiesin tsifrlandyrýǵa jáne meditsinalyq aqparattyq júielerdi integratsiialaýǵa erekshe nazar aýdaryldy.
Densaýlyq saqtaý vitse-ministri Oljas Ábishev meditsinalyq uiymdar kompiýterlik tehnikamen jáne internetpen 100% aýdandyq deńgeide qamtamasyz etilgenin aitty.
Búginde elektrondy densaýlyq pasporty, ambýlatorlyq kartalar, dispanserlik esepke alý tolyq tsifrlandyrylǵan.
Densaýlyq saqtaý basqarmasynyń basshysy Erjan Nurlybaev Qaraǵandy oblysyndaǵy pilottyq jobanyń nátijesin qorytyndylai kele, óńirde barlyq meditsinalyq uiym biryńǵai meditsinalyq aqparat júiege kóshkenin jetkizdi. Sonymen qatar, aýyldardaǵy 85 meditsinalyq pýnkt spýtniktik bailanys arqyly internetke qosylǵan.
Ol ótken 3 aida halyqty sáikestendirý, aqparattyq júieler arqyly TMKKK jáne MÁMS paketterin bólek esepke alý jáne meditsinalyq qyzmetterdi jetkizýshi meditsinalyq mekemelerdi yntalandyrý jumystary júrgizilgenin aitty.
Erjan Nurlybaev pilot kezeńinde ońaltý qyzmetteri 1,5 esege, kúndizgi statsionarda meditsinalyq kómek 1,2 esege, konsýltatsiialyq-diagnostikalyq qyzmetterdiń kólemi 2 esege artyp, qymbat diagnostika(KT jáne MRT)sany tamyz aiynda 1265-ten qarasha aiynda 3885-ke deiin óskenin atap ótti.
Vitse-ministr Liazat Aqtaeva MÁMS engizilgen soń alǵashqy ailarda aldymyzdan shyǵýy múmkin 9 táýekeldi atap ótti: saqtandyrylmaǵan azamattar, qorǵa turaqsyz tólem jasaityn jumys berýshiler, óńirlerdegi ózin-ózi jumyspen qamtyp júrgen adamdardy ózektendirý jáne biryńǵai statistikalyq esep júrgizý. Meditsinalyq saqtandyrý qory osy qaýip-qaterdi sheshýdiń tiimdi stsenariileri men tetikterin ázirledi. Mysaly, jeńildik jasalǵan sanattaǵy azamattardyń saqtandyrý mártebesi belgisiz bolǵan jaǵdaida, jeńildik mártebesin rastaityn qujat, stýdenttik bilet, týý týraly nemese zeinetaqy kýáligin kórsetse boldy.
Ózin-ózi jumyspen qamtyǵan adamdar arnaiy terminal arqyly meditsinalyq saqtandyrý qoryna tólem jasaidy jáne birden saqtandyrylǵan mártebesin alyp, MÁMS júiesine jyldam qosyla alady.
MÁMS qorynyń basshysy A. Jumaǵulov jumys berýshiler turaqty tólem jasaý úshin salyq organdary baqylaýdy kúsheitetinin eske saldy.
Sondai-aq, vitse-ministr meditsina qyzmetkerlerin TMKKK jáne MÁMS paketterin, ishki biznes-protsesterdi bilýge oqytýdy jalǵastyrý qajettigin atap ótti.
Ministr alqa otyrysyn qorytyndylai kele, meditsinalyq saqtandyrýdy engizýge daiyndyq deńgeiin joǵary baǵalady.
Vedomstvo basshysy aimaqtyq densaýlyq saqtaý basqarmalaryn qormen birlesip, jetkizýshi meditsinalyq mekemelerge menshigine qaramai 2020 jyly meditsinalyq qyzmetterdi obektivti jáne tiimdi bólýge shaqyrdy.
«Meditsinalyq kómek kórsetý barysynda daýly jaǵdailar kezdesse, másele patsienttiń paidasyna sheshilýi tiis», - dedi Eljan Birtanov.
Ol densaýlyq saqtaý basqarmalary men MÁMSQ filialdarynyń basshylarynan meditsinalyq uiymdardy jańa júiege daiyndap, ásirese meditsina qyzmetkerlerin MÁMS boiynsha jumys isteýge oqytý sharalaryna erekshe nazar aýdarýdy talap etti.
