Qazaqstannyń Bas memlekettik sanitar dárigeriniń shekteý is-sharalaryn jáne karantindi engizý jónindegi ókilettikteri kúsheitiledi. Bul týraly QR Parlamenti Senatynyń jalpy otyrysynda QR Densaýlyq saqtaý ministri Eljan Birtanov aitty, dep habarlaidy QazAqparat.
«Memleket basshysy Qasym-Jomart Toqaev osy jyldyń 27 sáýirindegi málimdemesinde kodeks jobasyna halyq densaýlyǵyn saqtaý jáne sanitarlyq-epidemiologiialyq qyzmet júiesin jaqsartýǵa baǵyttalǵan praktikalyq usynystar engizýdi tapsyrdy. Osylaisha kodeks jobasynda bas memlekettik sanitar dárigerlerdiń shekteý is-sharalaryn jáne karantindi engizý jónindegi ókilettikterin kúsheitý, halyqtyń sanitariialyq-epidemiologiialyq salamattylyǵy salasyndaǵy memlekettik organnyń laýazymdy tulǵalaryn áleýmettik qorǵaý boiynsha sharalar engizý, Densaýlyq saqtaý ministrligine tótenshe jaǵdaidy engizý kezeńinde meditsinalyq kómek kórsetýdi uiymdastyrý tártibin aiqyndaý boiynsha quzyret berý kózdelgen», - dedi «Halyq densaýlyǵy jáne densaýlyq saqtaý júiesi týraly» kodeks pen «Keibir zańnamalyq aktilerge densaýlyq saqtaý máseleleri boiynsha túzetýler engizý jóninde» ilespe zań jobasyn tanystyrǵan ministr.
Sonymen qatar onyń aitýynsha, densaýlyq saqtaý salasyndaǵy tótenshe jaǵdaida jedel den qoiý maqsatynda dárilik zattardyń sapasy men qaýipsizdigine áser etetin jaǵdailar týyndaǵan kezde farmatsevtikalyq inspektsiia júrgizý, memlekettik-jekeshelik áriptestikti qoldana otyryp, densaýlyq saqtaý infraqurylymyn jaqsartý kózdeledi.
«Kórsetilgen túzetýlerdi qabyldaý nátijesinde ainaladaǵylarǵa qaýip tóndiretin aýrýdyń taralý múmkindigi tómendeidi. Áleýmettik qorǵaý jáne sanitarlyq-epidemiologiialyq qadaǵalaý qyzmetin nyǵaitý, tótenshe jaǵdai kezeńinde jekelegen meditsinalyq qyzmetter kórsetýdi jedel uiymdastyrý, dárilik zattardyń sapasy men qaýipsizdigi qamtamasyz etiledi. Densaýlyq saqtaý salasyndaǵy kontsessiialyq jobalaryn tiisinshe iske asyrý jaqsarady», - dedi Eljan Birtanov.
