22 maýsymda densaýlyq saqtaý ministri Eljan Birtanov Aqmola oblysy Tselinograd aýdany Qabanbai batyr aýylyndaǵy dárigerlik ambýlatoriiada jumys isteitin jas dárigerlerdiń turǵyn úiine qatysty pikirin Facebook-te jariialady.
Ministr jergilikti ákimdik «Diplommen aýylǵa» memlekettik baǵdarlamasy aiasynda aýylǵa 3 jylǵa jumys isteýge keletin dárigerlerge «turýǵa jaraityndai» úi bermei otyr degen bolatyn.
Araǵa 1,5 ai salyp, Qabanbai aýylyndaǵy dárigerlerdiń turǵyn úiin kórýge attandyq. Aldymen ministr aralaǵan ekiqabatty jekemenshik ǵimaratqa bardyq. Bul jerde kommýnaldyq shyǵyndardy qosa eseptegende bir bólmeniń aqysy – 35 myń teńge. Dáriger jaldap turǵan bólme jabyq turdy.
Ári qarai ambýlatoriiaǵa jol tarttyq. Bir ǵana dáriger bar eken. Esimi – Azat Temirbekov, jalpy tájiribelik dáriger. Atalǵan jataqhanada turǵan. Biraq qazir jumysqa Nur-Sultannan qatynap júr.
«Ministr kelgen kezde dáriger qyzben sóilesken. Qazir ol maman Almaty qalasynyń turǵynyna turmysqa shyǵyp kóship ketti. Ol «Diplommen aýylǵa» baǵdarlamasymen 2 jyl buryn kelgen. Ministrge jaqsy turǵyn úi bolsa degen ótinish aitady. Sodan keiin Eljan Birtanov ekiqabatty jekemenshik ǵimaratqa barǵan. Biraq qyz ol úide emes, basqa jataqhanada turatyn. Al men sol ministr barǵan jekemenshik ǵimarattyń ekinshi qabatynda 1 bólmeni 35 myń teńgege 6 aidai jaldap turdym. Kóktemde jylý sóndirilgen úi qatty sýyp ketip, aýyryp qaldym. Sodan keiin kóshýge týra keldi. Qazir Nur-Sultanda páter jaldap turamyn. Kúnige tańerteń kelip, keshke ketemin», - dedi dáriger.
Azat Temirbekov aýyldyq ákimdikke apta buryn barǵan. Úi máselesin sheship berýin ótingen. 2 jyldan beri eshqandai nátije bolmaǵan. Endi 1 jyldan keiin «otrabotka» merzimi de aiaqtalady.
«2017 jyly Astana meditsina ýniversitetin bitirdim. Qosshy aýylynda 1 jyldai dáriger boldym. Keiin osynda aýystyrdy. Mine osy ambýlatoriiada istep jatqanyma 1 jyl boldy. Úimen qamtamasyz etken joq. Ózim taýyp turdym. Múmkin 50% ótep berer degen úmit boldy. Ákimdikke bardym. Eshqandai nátije joq. Osydan apta buryn ǵana baryp, aýyldyq ákimniń orynbasarymen sóilestim. Ákim ornynda joq eken. Ákim kelgen soń jaýabyn aitamyz degen. Qazir endi kúnde qaladan kelip jumys isteimin. Sebebi munda turatyn jer joq. Ýniversitette «aýyldyq kvotamen» tegin oqyǵan soń Qazaqstannyń aýyldyq jerinde 3 jyl jumys isteý kerek. Endi bir jylym qaldy», - dedi jas maman.
Aýyldyq ambýlatoriia
Aitýynsha, qazir ambýlatoriiada jalǵyz ózi aýyldyqtardy qabyldaidy. Bul aýylda 9 myń turǵyn bar. Jumysqa turý úshin keletin jas mamandar turatyn jer joq dep ketip qalady.
«Bir bólimshege jalǵyz dárigermin. Ekinshi dáriger meditsinalyq poiyzben 8 aiǵa ketken. Jaqynda kelý kerek. Bireýi jańaǵy ministr sóilesken qyz, Almatyǵa kóship ketti. Endi taǵy bir jas maman kele jatyr dep estidik. 4 ýchastokke 4 dáriger bolý kerek. Keshe jumys izdep jas dáriger keldi, biraq úimen qamtamasyz etpeidi eken dep ketip qaldy», - dedi Temirbekov.
Dárigerden shyǵyp aýyldyq ákimdikke jettik. Ákim ornynda joq eken. Onyń orynbasary Shámshiǵali Ospanov qabyldady. «Diplommen aýylǵa» kelgen dárigerlerdiń turǵyn úii bar ma?» degen suraq qoidyq.
«Qazir ákim aýdanǵa jinalysqa ketti. Kelgen soń jaýap beremiz. Erteń túske deiin habarlasamyz», - dedi.
Sendik. Ertesi túske deiin Shámshiǵali Ospanovqa habarlastyq. Ákim qujat jumystarymen shyǵyp ketkenin, tústen keiin jaýabyn beretinin» aitty.
Aýyl ákimdiginen saǵat 17.43 hat keldi. Onda biz suraǵan jas dárigerlerdiń turǵyn úiine qatysty emes, jalpylama jaýap jazylǵan.
«Diplommen aýylǵa» baǵdarlamasymen aýdanymyzda aýyldy jerlerge jumysqa kelgen áleýmettik salalar mamandaryna qoldaý kórsetý sharalary qarastyrylǵan.
Qoldaý sharalary: 70 ailyq esepti kórsetkish (176750 tenge) kólemindegi kóterme aqy bir jolǵy járdemaqyny tóleý; 1500 ailyq esepti kórsetkish (3787500 tenge) kóleminde turǵyn úi alýǵa nemese qurylysy úshin biýdjettik nesie qarastyrylǵan;
Baǵdarlamaǵa qatysý úshin kelesi qujattar qajet: Ótinish; Jeke kýáligi kóshirmesi; Jańa jumys ornynyń kadrlyq qyzmetten rastalǵan eńbek kitapshasy kóshirmesi; Azamattardy tirkeý meken – jái anyqtamasy; Bilimi týraly diplom kóshirmesi; Salyq tóleýshiniń tirkelýi jónindegi kýálik; Áleýmettik jeke kodyn alǵany jóninde kýálik kóshirmesi; QR qoldanystaǵy zańyna sáikes turǵyn úidi satý-satyp alý týraly aldyn ala kelisimsharty», - delingen resmi hatta.
Video: Kenjetai Aqseiitov
Rahilia BEKNAZARQYZY
