Biryńǵai jinaqtaýshy zeinetaqy qorynan birretik tólem alý joldary jeńildetildi. Bul týraly «Otbasy bankiniń» basqarma tóraiymy Lázzat Ibragimova málim etti, dep habarlaidy "Ult aqparat".
«20 kúnniń ishinde, tipti odan erterek www.enpf-otbasy.kz portalynda sizdiń turǵyn úi jaǵdaiyńyzdy jaqsartýǵa degen armanyńyzǵa bastar joldy jeńildete túsetin qyzmet engiziledi», - dep jazdy ol Facebook-paraqshasynda.
Máselen páter satyp alý nemese zaimdy óteýge arnalǵan qujattardy júktegenge deiin birrettik zeinetaqy tólemin alǵan soń oǵan týysyńyz bergen qarajatty qosý múmkindigi beriledi. Bul, ásirese birrettik zeinetaqy tólemin alǵannan keiin úlken somaǵa jyljymaityn múlik satyp alýdy josparlanǵandar úshin yńǵaily.
Iaǵni, qosymsha túimeshik paida bolady.
Biryńǵai jinaqtaýshy zeinetaqy qorynan sizdiń arnaýly esepshotyńyzǵa aqsha túsken soń birrettik zeinetaqy tólemin paidalaný maqsatyn endi ózgertýge nemese túzetýge bolady.
Iaǵni, paidalaný maqsatyn ózgertý túimeshegi engiziledi.
Sonymen qatar zeinetaqy tólemi arnaýly esepshotqa túsip qoiǵan bolsa, onda siz ótinimińizdi joia alasyz. Demek, qarajatyńyz 45 táýlikti kútpesten Biryńǵai jinaqtaýshy zeinetaqy qoryna qaitarylady.
Iaǵni, ótinimdi joiý nemese BJZQ-ǵa qaitarý túimeshegi engiziledi.
«Budan bólek, arnaýly esepshotqa aqsha túsýdiń alǵashqy úsh kúninde kópshilik aqshanyń túsken, túspegendigin qarai almai shatasyp jatty. Sondyqtan búginnen bastap klientterge aqshanyń arnaýly esepshotqa túskeni týraly súiinshi jańalyq ákeletin SMS jiberiledi.
Sondai-aq, Otbasy bankindegi zaimdy jartylai merziminen buryn óteý boiynsha qosymsha kelisimge qol qoiý qyzmeti júzege asyrylatyn bolady. Barlyq qujatty internet bankingte qol qoiasyz», - dedi Lázzat Ibragimova.
Buǵan deiin habarlaǵanymyzdai, búginge deiin Biryńǵai jinaqtaýshy zeinetaqy qory turǵyn úi jaǵdailaryn jaqsartý úshin qazaqstandyqtardyń arnaiy shottaryna 112,3 milliard teńgeden astam qarjy aýdardy.
