Foto: Baq.kz.
Búgin Májilis otyrysynda birneshe depýtat eltańbany ózgertýge qatysty suraý joldady, – dep habarlaidy "Ult aqparat".
Depýtat Abzal Quspan eltańbany qoǵammen talqylaý týraly Prezidenttiń bastamasyn qoldaitynyn, ony zaman suranysyn eskerip, jetildirý kerek ekenin aitty.
"Bul usynys qoǵamnyń qyzyǵýshylyǵyn týǵyzyp, qyzý talqylanýda. Olardyń bir toby qoldanystaǵy gerbti osy qalpynda qaldyraiyq dese, endi biri zaman talabyna sai ózgerteiik deidi. Bul - zańdy ári oń qubylys. Azamattyq qoǵamnyń belsendiligi men jetilgeniniń kórinisi.
Ekinshi jaǵynan, jurtshylyqtyń eldik nyshandarǵa bei-jai qaramaitynyn, otanshyldyq seziminiń joǵarylyǵyn aiqyn ańǵartady. Álemdik tájiribege súiensek, memleket gerbi sol eldiń tereń tarihymen, tól dúnietanymymen jáne alǵa qoiǵan muratymen tyǵyz bailanysty bolady. Gerb ataýynyń ózi «mura» degen uǵymdy bildiredi. Keibir elder gerbsiz, emblemamen ǵana shektelgen", - degen A.Quspan qazirgi qoldanystaǵy eltańba da kóńilinen shyǵatynyn aitty.
Abzal Quspannyń aitýynsha, Qazaq memleketi 1991 jyly ǵana paida bolmaǵanyn, onyń memlekettilik tarihynyń tereńde jatqanyn da eskergenimiz jón deidi.
"Ol - arǵydaǵy Saq, Ǵun, Túrik qaǵanaty, Ulyq Ulys - Joshy ulysynyń, bergidegi Qazaq handyǵynyń tikelei murageri. Bul - erlik pen órlikke toly tarih. Biyl Qazaq Dalasynda tý kótergen Joshy ulysy - Altyn Ordanyń qurylǵanyna 800 jyl tolýyn atap ótkeli otyrmyz. Mine, Qazaq eliniń osyndai tereń tarihi sabaqtastyǵy, jaýynger ata-babalarymyzdyń asqaq rýhy, memlekettiliktiń susy men sesi, ataǵy men aibyny Gerbte kórinis tapsa igi. Sondyqtan aldaǵy ýaqytta osy baǵytta kóp bolyp keńesý artyqtyq etpeidi", - dedi depýtat.
Májilis depýtaty Erkin Ábil eltańba tek qazaqstandyqtarǵa ǵana emes, sondai-aq shetel azamattaryna da qarapaiym, túsinikti bolýy kerek dep otyr.
"Eltańbada memlekettiń tarihi ereksheligi baiqalmaidy, Qazaqstan Ulttyq táýelsiz memleket ekenin aiqyndap turǵany kórinbeidi", - dei kele depýtat geraldika men tarih mamandarynyń pikirine súienip sheshim shyǵarý qajet dep esepteitinin aitty.
