Aqmola, Qostanai, Shyǵys Qazaqstan jáne Mańǵystaý oblystarynda igerilmegen jaiylymdar birtindep memleketke qaitarylýda. Bul týraly Ulttyq qoǵamdyq senim keńesiniń 3-otyrysynda QR Prezidenti Qasym-Jomart Toqaev aitty, dep habarlaidy "Ult aqparat".
«Saiasi reformalardyń birinshi toptamasyna kiretin basqa da zań jobalary ázirlenip jatyr. Sondai-aq sailaý týraly jáne saiasi partiialar týraly zańdarǵa ózgerister engizetin qujattarǵa qol qoidym. Biz Parlamenttik oppozitsiia instýtyn engizdik. Saiasi partiialardy tirkeýge qatysty talap jeńildetildi», - dedi Memleket basshysy.
QR Prezidenti sailaýǵa túsetin saiasi partiialar áielder men jastar úshin 30 paiyzdyq kvota bóletindigin basa aitty.
«Jala jabýdy qylmys sanatynan alyp tastaý jáne Qylmystyq kodekstiń 174-babyn izgilendirý jónindegi normalarǵa azamattar barynsha qoldaý bildirdi. Munan bólek, basqa da máseleler boiynsha naqty nátije bar. Shetelden jumysshylar ákelýge belgilengen kvota 40 paiyzǵa azaidy», - dedi Qasym-Jomart Toqaev.
Memleket basshysy Esep komiteti memlekettik organdarda júrgizilgen tekseristiń aýditorlyq qorytyndylaryn jariialai bastaǵanyn aitty.
«Aqmola, Qostanai, Shyǵys Qazaqstan jáne Mańǵystaý oblystarynda igerilmegen jaiylymdar birtindep memleketke qaitarylýda. Buǵan ǵaryshtan monitoring júrgizý arqyly qol jetkizdik. Munyń bári Ulttyq keńestiń bastamasymen júzege asyrylǵan sharalardyń bir bóligi ǵana. Barshańyzǵa qazirgidei kúrdeli kezeńde ózekti máselerdi talqylaýǵa belsene qatysqandaryńyz úshin alǵys aitamyn», - dedi QR Prezidenti.
