QR Ishki ister ministri Qalmuhanbet Qasymov, QR Densaýlyq saqtaý, Bilim jáne ǵylym vitse-ministrleri men komitet basshylarynan quralǵan Qazaqstan Respýblikasy Úkimetiniń respýblikalyq aqparattyq-nasihattyq toby Memleket basshysynyń Qazaqstan halqyna Joldaýyn túsindirý boiynsha kezdesýler ótkizip, aimaqtyń áleýmettik-óndiristik nysandarynyń jumysymen tanysty.
Jumys sapary barysynda QR Ishki ister ministri Qyzylorda oblysy IID-niń «Biryńǵai tótenshe qyzmet «112» jobasymen tanysty. Qyzylordada «Smart Qaýipsizdik» jobasyn iske asyrý aiasynda órt qaýipsizdigi, qutqarý qyzmeti, politsiia, jedel járdem jáne avariialyq gaz boiynsha kezekshi qyzmetterdi biriktiretin «112» Biryńǵai tótenshe qyzmeti engizilýde. «112» qyzmetiniń monitoring júiesi barlyq kiris qońyraýlaryn, sondai-aq, qalanyń elektrondyq kartasy boiynsha ekipajdardy kórsetedi. Patrýldik jasaq mobildik qosymshasy bar planshettermen qamtylǵan, onda barlyq qońyraýlar oqiǵanyń sipattamasymen qosa kelip túsedi.
Sonymen qatar, Ishki ister ministri Qalmuhanbet Qasymov aǵymdaǵy jyldyń maýsym aiynda ashylǵan Jalaǵash AIIB ákimshilik ǵimaratynda boldy. AIIB-nyń úsh qabatty ákimshilik ǵimaratynda baqylaý-ótkizý pýnktteri, «bir tereze» qaǵidaty boiynsha memlekettik qyzmetterdi usyný kabinetteri bar. Sondai-aq, keshen qyzmetkerlerge arnalǵan jataqhana, arnaiy mekeme, jaýap alý men tir bólmelerin qamtidy.
Oblys aktivimen kezdesý barysynda Elbasy Joldaýynyń negizgi mindetterin iske asyrý mehanizmderi talqylandy.
Aqparattyq toppen kezdesýde oblys ákimi Q.Kósherbaev Joldaýdan týyndaityn tapsyrmalardyń aimaqta oryndalý barysymen tanystyrdy.
«Memleket basshysy árqashan qazaqstandyqtarǵa áleýmettik qoldaý kórsetý máselesine basa nazar aýdaryp keledi. Osy Joldaýda memlekettiń básekege qabilettiligin arttyratyn buryn qabyldanǵan memlekettik baǵdarlamalardyń jalǵasy retinde áleýmettik-ekonomikalyq damýdyń jańa baǵyttary usynyldy», - dedi aimaq basshysy.
QR Ishki ister ministri Qalmuhanbet Qasymov Joldaýdyń mindetteri boiynsha vodomstvanyń atqarǵan jumystary jaily baiandady.
«Memleket basshysy Joldaýynda negizgi basymdyqtardy aiqyndap berdi. Onyń ishinde politsiia qyzmetiniń qurylymyn jańǵyrtý, ony jańa deńgeige kóterý týraly nusqaý berildi. Sebebi qoǵamdyq qaýipsizdik bárinen de mańyzdy bolyp tabylady. Qazirgi tańda kóp ister atqaryldy, biraq ishki ister organdarynyń jumysynda áli sheshilmegen máseleler bar, sondyqtan álde de atqaratyn jumystar kóp», - dedi QR Ishki ister ministri.
Óz kezeginde, QR Densaýlyq saqtaý vitse-ministri Lázzat Aqtaeva densaýlyq saqtaý salasyn jańǵyrtý, meditsina qyzmetkerleriniń mártebesin kóterý men olardyń júktemesin tómendetý Joldaý basymdyqtarynyń biri ekenin atap ótti.
«Densaýlyq saqtaýdyń elektrondyq pasporttaryn engizý dárigerlerdiń júktemesin aitarlyqtai azaitady. Búgingi kúni 15 mln. Qazaqstandyq elektrondyq meditsinalyq pasportpen qamtylǵan, al 2020 jylǵa qarai barlyq azamattar elektrondyq densaýlyq pasportymen qamtamasyz etiletin bolady», - dedi Lázzat Aqtaeva.
Bilim jáne ǵylym vitse-ministri Ashat Aimaǵambetov Joldaýda muǵalimderdiń mártebesin joǵarylatý, artyq tekserýlerdi joiý, yntalandyrý sharalary men mektep oqýshylaryna júktemeni tómendetý jóninde erekshe atap ótilgenin aitty. Statistika boiynsha Qazaqstan TMD elderi arasynda oqýshylaryna eń joǵary júkteme qoiatynyn, qazirgi tańda ministrlik bilim berýdi jetildirý boiynsha usynystar jinaqtap jatqanyn aitty.
«Qyzylorda oblysynda memlekettik-jekemenshik áriptestik aiasynda balabaqshalar ashýdyń ozyq tájiribesi bar ekenin atap ótkim keledi. Mektepke deiingi mekemelerdiń 72 paiyzy jekemenshik, sondai-aq, mektep jasyna deiingi balalardy júz paiyz balabaqshamen qamtý máselesi sheshimin tapqan», - dedi vitse-ministr.
Aqparattyq-nasihat top óńirdegi áleýmettik jáne óndiristik nysandardyń jumysymen tanysyp, aýdandarda halyqpen kezdesýler ótkizdi.
