Búgin Májiliste QR Eńbek jáne halyqty áleýmettik qorǵaý ministri Serik Shapkenov «Qazaqstan Respýblikasynyń keibir zańnamalyq aktilerine azamattardyń jekelegen sanattaryn áleýmettik qorǵaý máseleleri boiynsha ózgerister men tolyqtyrýlar engizý týraly» zań jobasyn tanystyrdy, dep habarlaidy "Ult aqparat".
«Zań jobasy Múgedekterdiń quqyqtaryn qamtamasyz etý jáne turmys sapasyn jaqsartý jónindegi 2025 jylǵa deiingi ulttyq jospardy oryndaý (QR ÚQ 28.05.2019 j.) aiasynda ázirlengen jáne Úkimettiń zań jobalaý jumystarynyń josparynda kózdelgen.
Joba negizine Parlament Senatynyń jáne Májilisiniń jumys toby músheleriniń, Úkimet janyndaǵy múgedektigi bar adamdar máseleleri jónindegi úilestirý keńesiniń, sondai-aq jurtshylyq pen saraptamalyq qoǵamdastyqtyń usynystary qabyldandy. 75 zańnamalyq aktige, onyń ishinde 10 kodekske ózgerister men tolyqtyrýlar engizý kózdelip otyr», - dedi ministr.
Zań jobasy mynadai maqsattarda ázirlendi:
- Birkken Ulttar Uiymynyń Múgedekterdiń quqyqtary týraly konventsiiasynyń zańnamadaǵy kemsitýshilik terminderdi joiý jónindegi normalaryn implementatsiialaý;
- múmkindigi shekteýli adamdardy áleýmettik qorǵaýdy jetildirý;
- Áleýmettik qyzmetter portaly arqyly «invataksi» (2023 jyldan bastap) jáne arnaýly áleýmettik qyzmetterdi alýǵa qujattardy resimdeý, tabysy az otbasylardy kepildendirilgen áleýmettik toptamamen qamtamasyz etý;
- jumysqa ornalastyrýdy yntalandyrý jáne múgedektigi bar adamdardyń ekonomikalyq belsendiligi úshin múmkindikter jasaý;
- eńbek ardagerleri sanattaryn keńeitý;
- bala bir jasqa tolǵanǵa deiin onyń kútimine bailanysty tabysynan aiyrylǵan, eńbek qyzmeti qaita bastalǵan jaǵdaida tólenetin áleýmettik tólemniń kepildik berilgen deńgeiin belgileý.
«Osy normalar «Nur Otan» partiiasymen qoldaý tapqanyn jáne sailaýaldy tuǵyrnamada qamtylǵanyn atap ótý kerek», - dedi Serik Shapkenov.
Osy oraida ol tujyrymdamalyq jańalyqtarǵa toqtaldy.
«Birinshiden, múgedektiktiń sebebine qaramastan 1-toptaǵy múgedektigi bar adamdarǵa kútim jasaityn adamdarǵa járdemaqy engizý. Osy járdemaqymen kútim jasaityn qosymsha 24 myńnan astam adam qamtylatyn bolady. Sondai-aq, meditsinalyq-áleýmettik kórsetilimder negizinde qajettilik dárejesin eskere otyryp, jeke kómekshiniń qyzmetterin kórsetý tetigi ózgertiletin bolady», - dedi ministr.
